Dinamalar

கோவை : சுற்றுலா பயணியர் வருகை அதிகரித்துள்ளதால், ஊட்டிக்கு சிறப்பு ரயில் இயக்கப்படும் என, தெற்கு ரயில்வே அறிவித்துள்ளது.

நீலகிரி மாவட்டத்தில் உள்ள கோடை வாசஸ்தலமான ஊட்டிக்கு சுற்றுலா வருவோர் எண்ணிக்கை அதிகரித்துள்ளது. இதையடுத்து பயணியர் வசதிக்காக மேட்டுப்பாளையம் - ஊட்டிக்கு சிறப்பு ரயில் இயக்கப்படும் என, தெற்கு ரயில்வே அறிவித்துள்ளது.
மேட்டுப்பாளையம் - ஊட்டி இடையே (எண்:06171) சிறப்பு ரயில் சனிக்கிழமைகளில், காலை, 9:10 மணிக்கு மேட்டுப்பாளையத்தில் இருந்து புறப்படும்; மதியம், 2:25 மணிக்கு ஊட்டி சென்றடையும். இந்த ரயில், வரும், 21 முதல், ஜூலை, 16 வரை இயக்கப்படும்.

இதேபோல் மறுமார்க்கத்தில், ஊட்டி - மேட்டுப்பாளையம் இடையே (எண்:06172) சிறப்பு ரயில், வெள்ளிக்கிழமைகளில் காலை, 11:25 மணிக்கு புறப்பட்டு, மாலை, 4:20 மணிக்கு மேட்டுப்பாளையம் வந்தடையும். இந்த ரயில் வரும், 27 முதல் ஜூலை 22 வரை இயக்கப்படும்.சிறப்பு ரயில், கல்லார், ஹில்குரோவ், குன்னுார், வெலிங்டன், அருவங்காடு, கேத்தி, லவ்டேல் ஆகிய ரயில்வே ஸ்டேஷன்களில் நின்று செல்லும்.
மேலும், சுற்றுலா பயணிகளின் வசதிக்காக, ஊட்டி - கேத்தி இடையே தினமும் மூன்று சுற்றுவட்ட பயணத்துக்கு ஏற்பாடு செய்யப்பட்டுள்ளது. வாரத்தில் வெள்ளி, சனி தவிர பிற நாட்களில், இந்த சுற்றுவட்ட பயணம், வரும் 22ம் தேதி முதல், ஜூலை, 21 வரை இருக்கும் என அறிவிக்கப்பட்டுள்ளது.

உடனுக்குடன் உண்மை செய்திகளை உங்களது
தினமலர் டெலிகிராம் சேனலில் பார்க்கலாம்

Click here to join
Telegram Channel for FREE