Dinamalar

திருச்சி மாவட்டம் மணப்பாறை நகராட்சியில் 27 வார்டுகள் உள்ளன. உள்ளாட்சி தேர்தலில் அ.தி.மு.க.வில் 11 பேரும் தி.மு.க. மற்றும் அதன் கூட்டணி கட்சியைச் சேர்ந்தவர்கள் 11 பேரும் வெற்றி பெற்றனர். சுயேச்சையாக போட்டியிட்ட ஐந்து பேர் வெற்றி பெற்றனர்.
அனைத்து சுயேச்சை கவுன்சிலர்களும் தி.மு.க.வுக்கு ஆதரவு தெரிவித்த போதிலும் அ.தி.மு.க.வைச் சேர்ந்த சுதா என்பவர் நகராட்சித் தலைவர் பதவியை கைப்பற்றினார். அதன் பின் இரண்டு முறை நடைபெற்ற துணைத் தலைவருக்கான தேர்தலில் தி.மு.க. மற்றும் அதன் கூட்டணி கட்சிகளும் சுயேச்சைகளும் பங்கேற்காததால் ஒத்தி வைக்கப்பட்டது.இந்நிலையில் நகராட்சி கவுன்சில் கூட்டமும் நடைபெறாததால் அ.தி.மு.க.வை சேர்ந்த நகராட்சித் தலைவர் சுதா சென்னை உயர் நீதிமன்றத்தின் மதுரை கிளையில் வழக்கு தொடர்ந்தார்.நகராட்சி கவுன்சில் கூட்டத்தை நடத்த வேண்டும் என்று நீதிமன்றம் உத்தரவிட்டது. அதன்படி இன்று நகராட்சி கூட்டம் நடைபெற உள்ளது.

மாநில தேர்தல் ஆணையத்தின் அறிவிப்புபடி நாளை மதியம் நகராட்சி துணைத் தலைவருக்கான தேர்தல் நடைபெற உள்ளது. இந்நிலையில் 1வது வார்டில் அ.தி.மு.க. சார்பில் போட்டியிட்டு வெற்றி பெற்ற செல்லம்மாள் என்ற கவுன்சிலரை அ.தி.மு.க.வினர் கடத்திச் சென்று விட்டதாக நேற்று தகவல் பரவியது.
இதையடுத்து மணப்பாறை போலீஸ் ஸ்டேஷனில் திரண்ட தி.மு.க.வினர் கவுன்சிலரை கடத்திச் சென்றவர்கள் மீது நடவடிக்கை எடுக்கும்படி போலீசாரிடம் வலியுறுத்தினர்.அதே சமயம் அ.தி.மு.க. முன்னாள் எம்.எல்.ஏ. சந்திரசேகர் உள்ளிட்ட 10 பேர் தாயை கடத்திச் சென்றதாக கவுன்சிலர் செல்லம்மாளின் மகன் பிரபு மணப்பாறை போலீசில் புகார் அளித்தார்.
புகார்படி அ.தி.மு.க. முன்னாள் எம்.எல்.ஏ. சந்திரசேகர் நகர செயலர் ராமமூர்த்தி உள்ளிட்ட 10 பேர் மீது மணப்பாறை போலீசார் வழக்குப் பதிவு செய்து விசாரித்து வருகின்றனர்.இதற்கிடையே 'என்னை யாரும் கடத்தவில்லை. கட்சி கூட்டத்திற்கு வந்தேன்; கூட்டம் முடிந்தவுடன் நாளை வந்து விடுவேன். எந்த பிரச்னையும் இல்லை' என்று செல்லம்மாள் பேசிய 'வீடியோ' சமூக வலைதளங்களில் பரவி வருகிறது.

உடனுக்குடன் உண்மை செய்திகளை உங்களது
தினமலர் டெலிகிராம் சேனலில் பார்க்கலாம்

Click here to join
Telegram Channel for FREE