Dinamalar

கொப்பரை விலை வெளிமார்க்கெட்டில், கிலோ, 81-85 ரூபாயாக சரிந்துள்ளது. கடந்தாண்டு இதே பருவத்தில், தோப்பில் ஒரு தேங்காய், 16 -20 ரூபாய்க்கு கொள்முதல் செய்யப்பட்டது.தற்போது ஏற்பட்டுள்ள விலை சரிவால், ஒரு தேங்காய், 8-12 ரூபாய்க்கு மட்டுமே கொள்முதல் செய்யப்படுகிறது.தேங்காய் கொப்பரைக்கு குறைந்தபட்ச ஆதார விலையாக, 105.90 ரூபாய் நிர்ணயித்து, அரசு கொள்முதல் நிலையங்கள் வாயிலாக கொள்முதல் செய்யப்படுகிறது.கொப்பரை உற்பத்திக்கான, தொழிலாளர்கள் மற்றும் உலர்கள வசதிகள் அனைத்து விவசாயிகளிடமும் இல்லை.சிறு, குறு விவசாயிகளால், தேங்காயை கொப்பரையாக மதிப்பு கூட்டுவது இயலாத காரியமாகும்.

எனவே, அரசின் கொப்பரை கொள்முதல் பெரிய மாற்றத்தை ஏற்படுத்தவில்லை.இதற்கு தீர்வாக, 'கொப்பரைக்கு பதிலாக, நேரடியாக தேங்காயை அரசு கொள்முதல் செய்து, நிறுவனங்களுடன் புரிந்துணர்வு ஒப்பந்தம் போட்டு, கொப்பரையாக மாற்றி இருப்பு வைத்து விற்கலாம்; ஒரு டன் உரித்த தேங்காய்க்கு குறைந்தபட்ச ஆதார விலையாக, 30 ஆயிரம் ரூபாய் அரசு கொடுக்க வேண்டும்.ரேஷன் கடைகளில், பாமாயிலுக்கு மாற்றாக சத்துகள் நிரம்பிய தேங்காய் எண்ணெயை வினியோகிக்க வேண்டும்,' என விவசாயிகள் கோரிக்கை விடுக்கத்துவங்கியுள்ளனர்.

இதனால், தேங்காய் எண்ணெயில் கலப்படம், தேங்காய் மற்றும் கொப்பரை சந்தையில் 'சிண்டிகேட்' தவிர்க்கப்படும் என்பது விவசாயிகள் கருத்தாக உள்ளது.இந்நிலையில், தேங்காய், கொப்பரை விலை சரிவு பிரச்னைக்கு திருப்பூர் மாவட்டத்தை சேர்ந்த எம்.பி., எம்.எல்.ஏ., க்கள் மவுனம் சாதித்து வருகின்றனர்.தேர்தல் பிரசாரத்தின் போது, தென்னை சாகுபடிக்கு, பல்வேறு வாக்குறுதிகளை அள்ளி வீசியவர்கள், பிரச்னையை கண்டுகொள்ளாமல், இருப்பது விவசாயிகளிடையே அதிருப்தியை ஏற்படுத்தியுள்ளது.