Dinamalar

மதுரை அருகே மணப்பட்டி சேகர் தாக்கல் செய்த மனு: மதுரை காமராஜ் பல்கலையில் 1991 ல் தினக்கூலி அடிப்படையில் தோட்ட பராமரிப்பு பணியில் சேர்ந்தேன். 2010 ல் பணி நீக்கம் செய்யப்பட்டேன்.
இதை எதிர்த்து மதுரை தொழிலாளர் நீதிமன்றத்தில் மனு செய்தேன். பணியில் அனுமதித்து ரூ.10 ஆயிரம் இழப்பீடு வழங்க அந்நீதிமன்றம் உத்தரவிட்டது. 2011ல் பணியில் அனுமதிக்கப்பட்டேன். தினக்கூலியாக நுாலக பணியில் சேர்ந்தேன். 30 ஆண்டுகள் பணி செய்தும் பணியை வரன்முறைப்படுத்தவில்லை. என்னுடன் பணிபுரிந்த சிலர் நிரந்தரம் செய்யப்பட்டனர். பல்கலை தரப்பில் மே 10ல் என்னிடம், பணி நீக்கம் செய்யபட்டதாக வாய்மொழியாக தெரிவிக்கப்பட்டது.

பணி நீக்கத்திற்கு தடை விதிக்க வேண்டும். இவ்வாறு சேகர் குறிப்பிட்டார். நீதிபதி ஆர்.சுரேஷ்குமார் விசாரித்தார். பல்கலை தரப்பு: 136 பேர் தினக்கூலிகளாக குறிப்பிட்ட கால வரம்பு அடிப்படையில் பணியில் ஈடுபடுத்தப்பட்டனர். பல்கலையின் நிதிநிலையை கருத்தில் கொண்டு உயர்கல்வித்துறை, நிதித்துறை செயலாளர்களின் ஆலோசனையின்படி பணி நீட்டிப்பு செய்யப்படவில்லை. மனுதாரர் தற்போது பணியிலிருந்து விடுவிக்கப்பட்டுள்ளார் என தெரிவித்தது.

நீதிபதி: பல்கலையில் எந்தெந்த கால கட்டத்தில், எத்தனை பேர் தினக்கூலி பணியாளர்களாக நியமிக்கப்பட்டனர், அவர்கள் எத்தகைய பணியில் ஈடுபடுத்தப்பட்டனர், நியமனத்திற்கு சிண்டிகேட் ஒப்புதல் அளித்துள்ளதா, யார், யார் பணியிலிருந்து விடுவிக்கப்பட்டனர் போன்ற விபரங்களை துணைவேந்தர், பதிவாளர் 3 வாரங்களில் அறிக்கையாக தாக்கல் செய்ய நோட்டீஸ் அனுப்ப உத்தரவிடப்படுகிறது. மனுதாரரை பணியிலிருந்து விடுவிக்காதபட்சத்தில் இந்நீதிமன்றம் அடுத்த உத்தரவு பிறப்பிக்கும் வரை பணியில் தொடர அனுமதிக்க வேண்டும் என்றார்.

உடனுக்குடன் உண்மை செய்திகளை உங்களது
தினமலர் டெலிகிராம் சேனலில் பார்க்கலாம்

Click here to join
Telegram Channel for FREE