Dinamalar

மதுரை:மதுரையில் போலீஸ் விசாரணைக்கு சென்ற தொழிலாளி தற்கொலை செய்ததற்கு ரூ.25 லட்சம் இழப்பீடு கோரிய வழக்கில் தமிழக அரசுக்கு நோட்டீஸ் அனுப்ப உயர்நீதிமன்ற மதுரை கிளை உத்தரவிட்டது.
மதுரை பீபி குளம் இந்திராநகர் ரங்கம்மாள் தாக்கல் செய்த மனு:எனக்கு ஒரு மகன், 2 பெண் குழந்தைகள். மகன் ஈஸ்வரன் தச்சுத் தொழிலாளி. அவரை ஒரு பொய் வழக்கு தொடர்பாக தல்லாகுளம் போலீசார் விசாரித்தனர். போலீசாரின் சித்ரவதையால் ஜன.,19 ல் அவுட்போஸ்ட் அருகே தீக்குளித்து தற்கொலை செய்தார். இவ்வழக்கு விசாரணையை சி.பி.சி.ஐ.டி., விசாரணைக்கு மாற்றி உயர்நீதிமன்றம் உத்தரவிட்டது.
சம்பந்தப்பட்ட போலீசார் மீது எந்த நடவடிக்கையும் இல்லை. அவர்கள் மீது ஒழுங்கு நடவடிக்கை எடுக்க வேண்டும். மகனின் மரணத்திற்கு ரூ.25 லட்சம் இழப்பீடு வழங்கக்கோரி தமிழக உள்துறை செயலருக்கு மனு அனுப்பினேன். நடவடிக்கை எடுக்க உத்தரவிட வேண்டும். இவ்வாறு ரங்கம்மாள் குறிப்பிட்டார்.நீதிபதி வி.சிவஞானம் உள்துறை செயலர், டி.ஜி.பி., தல்லாகுளம் இன்ஸ்பெக்டருக்கு நோட்டீஸ் அனுப்ப உத்தரவிட்டு ஜூலை 26 க்கு ஒத்தி வைத்தார்.