Dinamalar

பெரம்பலுார்: குடிபோதையில் தலைமை செயலக அதிகாரியிடம் ரகளையில் ஈடுபட்ட 'சைபர் கிரைம்' எஸ்.ஐ. ஆயுதப்படைக்கு மாற்றப்பட்டார்.

பெரம்பலுார் மாவட்ட சைபர் கிரைம் பிரிவில் எஸ்.ஐ.யாக பணியாற்றியவர் மனோஜ். ஜூன் 23 இரவில் பெரம்பலுார் பாலக்கரை பகுதியில் உள்ள தனியார் ஸ்டார் ஹோட்டலுக்கு மது அருந்த சென்றுள்ளார். அப்போது அங்கு மது அருந்திக் கொண்டிருந்த தலைமை செயலக உயர் அதிகாரிகள் சிலருக்கும் இவருக்கும் வாய்த்தகராறு ஏற்பட்டுள்ளது. தகராறு முற்றியதுால் தனக்கு நெருக்கமான சிலரை அங்கு வரவழைத்து உயர் அதிகாரிகளை தாக்க முயன்றுள்ளார்.

தலைமை செயலக உயர் அதிகாரிகள் இது குறித்து தலைமை செயலகத்துக்கு தெரிவித்து அங்கிருந்து பெரம்பலுார் கலெக்டர் எஸ்.பி. கவனத்துக்கு எடுத்து செல்லப்பட்டது. உடனே எஸ்.பி.யின் அலுவலக தனிப்பிரிவு போலீசார் சம்பவ இடத்துக்கு சென்று தலைமை செயலக உயர் அதிகாரிகளை சமாதானப்படுத்தி பாதுகாப்பாக அனுப்பி வைத்தனர்.

தொடர்ந்து சைபர் கிரைமில் எஸ்.ஐ.யாக பணியாற்றிய மனோஜ் ஆயுதப்படை பிரிவுக்கு மாற்றப்பட்டுள்ளார். ஏற்கனவே பா.ம.க. வக்கீல் ஒருவரை தாக்கி ஸ்டேஷன் லாக் - அப்பில் வைத்ததாக மனித உரிமை ஆணையத்தில் இவர் மீது வழக்கு நிலுவையில் உள்ளதாக போலீஸ் தரப்பில் கூறப்படுகிறது.