Dinamalar

குனியமுத்தூர்--கோவைபுதூர் அருகேயுள்ள குளத்துப்பாளையம், மகாலட்சுமி நகரை சேர்ந்தவர் ஸ்ரீகுமார்; மனைவி தங்கமணி, 34, இரு நாட்களுக்கு முன் இரவு பேரூர் ரோட்டில், பின் தொடர்ந்து பைக்கில் வந்த இருவரில் ஒருவர், தங்கமணி கழுத்திலிருந்த கவரிங் நகையை பறித்தார்.

இருவரும் பைக்கில் தப்பி பாரதி நகர் சந்திப்பில் செல்லும்போது, எதிரே வந்த பைக்கில் மோதினர்.இதில் பைக்கில் வந்த ஒரு பெண் மற்றும் ஆண் தூக்கி வீசப்பட்டு, மற்றொரு வாகனத்தில் மோதினர். அங்கிருந்தோர் இருவரையும் மீட்டு, சுந்தராபுரத்திலுள்ள தனியார் மருத்துவமனைக்கு அனுப்பினர்.இதனிடையே, நகையை பறித்து வந்த இருவரில் ஒருவருக்கும் காயமேற்பட்டது. மற்றொருவர் தப்பினார்.

காயமடைந்தவரை மக்கள் பிடித்து,போலீசாரிடம் ஒப்படைத்தனர்.விசாரணையில், காயமடைந்தது கோவையிலுள்ள தனியார் கல்லூரியில் மூன்றாமாண்டு பயிலும் ராமநாதபுரம் மாவட்டத்தை சேர்ந்த ஹரிஹரன், 21 என்பதும், தப்பியது மலுமிச்சம்பட்டியை சேர்ந்த ராமனாதன் எனவும் தெரியவந்தது. ஹரிஹரன் கோவை அரசு மருத்துவமனையில் சேர்க்கப்பட்டார்.காயமடைந்த பெண் தனியார் கல்லூரியில் இரண்டாமாண்டு பயிலும் தன்யாஸ்ரீ, 20; உடன் வந்தது அறிவழகன் எனவும் தெரிந்தது. குனியமுத்தூர் போக்குவரத்து புலனாய்வு பிரிவு போலீசார் விசாரிக்கின்றனர்.