Dinamalar

சென்னை:'சாகர் கவச்' பாதுகாப்பு ஒத்திகையின் போது, பயங்கரவாதிகள் போல ஊடுருவிய, 105 போலீஸ்காரர்கள் கைது செய்யப்பட்டனர்.
தமிழகம் மற்றும் புதுச்சேரியில், கடலோர பகுதிகள் மற்றும் முக்கிய இடங்களின் பாதுகாப்பை உறுதிப்படுத்தும் விதமாக, இரண்டு நாட்களாக, 'சாகர் கவச்' என்ற பாதுகாப்பு ஒத்திகை நிகழ்ச்சி நடத்தப்பட்டது. நேற்று முன்தினம் மாலை 7:00 மணி வரை இந்த நிகழ்ச்சி நடந்தது
.இதில், கடலோர காவல் படை, கடலோர பாதுகாப்பு குழுமம், காவல் துறை, மத்திய தொழில் பாதுகாப்பு படை, கடல்சார் வணிகத்துறை, கியூ பிரிவு, உளவுத்துறை உள்ளிட்ட படையினர் பங்கேற்றனர். இவர்களில், 110க்கும் மேற்பட்ட அதிகாரிகள் மற்றும் போலீசார், இரண்டு குழுக்களாக பிரிக்கப்பட்டனர்.

இவர்கள், பயங்கர வாத வாதிகள் போல, கடல் மற்றும் தரை வழியாக ஊடுருவினர்.இவர்களை, தமிழகம் மற்றும் புதுச்சேரி முழுதும் பாதுகாப்பு பணியில் ஈடுபட்ட போலீசார் மற்றும் உளவுத் துறை என, பல்வேறு படைகளைச் சேர்ந்த அதிகாரிகள் தடுத்து நிறுத்தினர். இப்பயிற்சியில், அதிநவீன கப்பல்கள், ஹெலிகாப்டர்கள், சாதாரண மற்றும் ஜெட் வேக படகுகள் பயன்படுத்தப்பட்டன.

பயங்கரவாதிகள் கப்பலில் பிடித்து வைக்கப்பட்டு இருப்பது போல, 14 பயணக் கைதிகள், பிளாக் கேட் காமாண்டோக்கள் உதவியுடன் மீட்கப்பட்டனர்.தமிழகம் முழுதும் 30 இடங்களில், பயங்கரவாதிகளின் ஊருவல் முறியடிக்கப்பட்டது; 105 பேர் கைது செய்யப்பட்டனர்; 19 படகுகள் கைப்பற்றப்பட்டன.இந்த பாதுகாப்பு ஒத்திகையில், மீனவ கிராமத்தைச் சேர்ந்த இளைஞர்கள் மிகவும் அசத்தலாக செயல்பட்டனர்.

இது குறித்து, கடலோர பாதுகாப்பு குழும அதிகாரிகள் கூறுகையில், 'சாகர் கவச் பாதுகாப்பு ஒத்திகை வெற்றிகரமாக நடத்தி முடிக்கப்பட்டுள்ளது. சுய பரிசோதனை செய்ததில், நம் பாதுகாப்பு அமைப்பு படையினர் செயல்பட்ட விதம் திருப்திகரமாக இருந்தது' என்றனர்.