Dinamalar

விக்கிரவாண்டி அருகே வீடூர் அணையில் உள்ள தைலமரக் காட்டில் ஏற்பட்ட தீ விபத்தில் 60 ஏக்கர் பரப்பிலான மரங்கள் எரிந்து சேதமானது.

விழுப்புரம் மாவட்டம், விக்கிரவாண்டி அடுத்த வீடூர் அணையின் மேற்கு புறத்தில் வனத்துறைக்கு சொந்தமான 250 ஏக்கர் பரப்பளவில் தைலமரக் காடு உள்ளது. இந்த காட்டில் 35 அடி உயரமுள்ள தைல மரங்கள் வளர்ந்து செழிப்பாக இருந்தது. நேற்று மாலை 5:30 மணிக்கு தைலமரக் காட்டில் உள்ள மரங்கள் திடீரென தீப்பிடித்து எரிந்தன.

விக்கிரவாண்டி தீயணைப்பு நிலைய அலுவலர் சுந்தரேஸ்வரன் தலைமையில் தீயணைப்பு வீரர்கள் சம்பவ இடத்திற்குச் சென்று தீயை அணைக்க முயன்றனர். மரங்கள் அடர்த்தியாக வளர்ந்துள்ளதால் தீயணைப்பு வாகனம் அருகே செல்ல முடியவில்லை.மேலும், காற்றும் பலமாக வீசியதால் தீ 30 அடி உயரத்திற்கு கொழுந்து விட்டு எரிந்து வருகிறது. இரவு 7:30 மணியளவில் சீரான மழை பெய்ததால் தீயின் தாக்கம் சற்று குறையத் துவங்கியது.

தீயணைப்பு வீரர்கள் தீ மேலும் பரவாமல் தடுப்பு நடவடிக்கைகளை மேற்கொண்டு வருகின்றனர். இரவு 8:30 மணி நிலவரப்படி 60 ஏக்கர் அளவில் தைல மரங்கள் எரிந்து சேதமாகியுள்ளதாக அதிகாரிகள் தெரிவித்தனர்.தீ விபத்துக்கான காரணம் குறித்து விக்கிரவாண்டி போலீசார் விசாரித்து வருகின்றனர்.