Dinamalar

செங்கம்: செங்கம் அருகே, தொடக்க வேளாண் கூட்டுறவு கடன் சங்கத்தில், 52 லட்சம் ரூபாய் மோசடியில் ஈடுபட்ட, அதன் செயலர் உள்பட மூன்று பேர், 'சஸ்பெண்ட்' செய்யப்பட்டனர்.

திருவண்ணாமலை மாவட்டம், செங்கம் அடுத்த சி.சொர்ப்பனந்தலில், தொடக்க வேளாண் கூட்டுறவு கடன் சங்கம் உள்ளது. இங்கு செயலர் வெங்கடேசன், முதுநிலை எழுத்தர், சீனிவாசன், உர விற்பனையாளர் விஜயன் ஆகியோர் பல்வேறு முறைகேட்டில் ஈடுபட்டுள்ளதாக, விவசாயிகள் மற்றும் பொதுமக்கள் புகார்கள் கூறினர். அதன் மீது விசாரணை நடத்த குழு அமைத்து, மாவட்ட துணை பதிவாளர் வசந்தலட்சுமி உத்தரவிட்டார். அந்த குழுவினர் நடத்திய ஆய்வில், செயலர் வெங்கடேசன் உள்ளிட்ட மூன்று பேரும், 52 லட்சம் ரூபாயை மோசடி செய்தது முதற்கட்ட விசாரணையில் தெரியவந்தது.இதையடுத்து அவர்கள் மூவரையும் நேற்று, சஸ்பெண்ட் செய்து, மாவட்ட துணைப்பதிவாளர் வசந்தலட்சுமி உத்தரவிட்டார். தற்காலிக வங்கி செயலராக பஞ்சாட்சரம் நியமிக்கப்பட்டுள்ளார்.