Dinamalar

ஈரோடு, வீரப்பன்சத்திரம், அண்ணா வீதியைச் சேர்ந்தவர் கண்ணன், 45; இவர், ஈரோடு எஸ்.பி., அலுவலகத்தில் அளித்த புகாரில், 'வீரப்பன்சத்திரம் பகுதியில் உள்ள எனக்கு சொந்தமான, 7.8 ஏக்கர் நிலம் போலி ஆவணம் மூலம் கிரயம் செய்யப்பட்டுள்ளது' என, தெரிவித்திருந்தார்.
மாவட்ட நில அபகரிப்பு பிரிவு போலீசார் விசாரித்தனர். இது குறித்து போலீசார் கூறியதாவது:கண்ணனின் தம்பி மூர்த்தி, 18 ஆண்டுக்கு முன் காணாமல் போனார். அவரது பெயர் கொண்ட தகர வேலை செய்யும் ஈரோடு, கருங்கல்பாளையம் பகுதியைச் சேர்ந்த முதியவரான மூர்த்தி, 63, மோசடியில் ஈடுபட்டுள்ளார்.

இவர், ஆதார் அட்டையில் தந்தை பெயர் மற்றும் இன்ஷியலை மாற்றி, ஈரோடு சார் - பதிவாளர் அலுவலகத்தில், சித்தையன் - சந்திரகலா பெயரில், 2020ல் கிரயம் செய்துள்ளார். இந்நிலையில், கண்ணன் தன் நிலம் குறித்து, வில்லங்கம் பார்த்தபோது இது தெரிந்தது. அதன் பின் புகார் அளித்தார்.
விசாரணையில் சித்தையன் - சந்திரகலா உள்ளிட்ட ஏழு பேர், ஆள் மாறாட்டம் செய்து நிலத்தை கிரயம் செய்ததை கண்டுபிடித்தோம்.நிலத்தை அபகரித்த வழக்கில் மூளையாக செயல்பட்ட மூர்த்தி, நேற்று கைது செய்யப்பட்டார். மற்ற ஐந்து பேரும், முன் ஜாமின் பெற்றுள்ளனர்.இவ்வாறு போலீசார் கூறினர்.