Dinamalar

செஞ்சி:திருவண்ணாமலையில் நடைபெற உள்ள அரசு விழாவில் பங்கேற்க முதல்வர் வர இருப்பதையொட்டி, திண்டிவனம் - திருவண்ணாமலை சாலை விரிவாக்கப் பணிகள் துரிதமாக நடந்து வருகிறது.
விழுப்புரம் மாவட்டம் திண்டிவனம் - கிருஷ்ணகிரி இடையிலான 178 கி.மீ., தேசிய நெடுஞ்சாலையை 7 மீட்டரில் இருந்து, 10 மீட்டர் விரிவாக்கம் செய்யும் பணி 2012 மே மாதம் துவங்கியது.அடுத்த சில ஆண்டுகளில் மத்தியிலும், மாநிலத்திலும் ஏற்பட்ட ஆட்சி மாற்றத்தால் பணிகள் தடைபட்டன. சாலையின் நிலை மோசமாகி பொதுமக்கள் பெரும் அவதிக்குள்ளாகினர்.
இது தொடர்பாக சென்னை, ஐகோர்ட்டில் பொது நல வழக்கும் தொடரப்பட்டது. இதன் பின், 2019 நவம்பரில் மீண்டும் புதிய ஒப்பந்தத்தில் பணிகள் துவங்கின.இந்த பணிகளை 20 மாதங்களில் முடிக்க வேண்டும். இந்த முறை கொரோனா ஊரடங்கு, தொடர் மழை காரணமாக மீண்டும் பணிகள் நிறுத்தப்பட்டன. கடந்த 2021ல் மீண்டும் பணி துவங்கி நடைபெற்று வருகிறது.இந்த ஆண்டு இறுதிக்குள் முடிக்க 'நகாய்' தரப்பில் திட்டமிட்டுள்ளனர்.

இந்நிலையில், வரும் 9ம் தேதி அல்லது அடுத்த சில நாட்களில் திருவண்ணாமலையில் அரசு நிகழ்ச்சிகளில் பங்கேற்க முதல்வர் ஸ்டாலின் வருகை தர உள்ளார்.இதற்கான ஏற்பாடுகள் குறித்து கடந்த மாதம் திருவண்ணாமலையில் நடந்த உயர் அதிகாரிகள் பங்கேற்ற ஆலோசனை கூட்டம் நடந்தது. இதில் மாநில நெடுஞ்சாலைத்துறை அமைச்சர் வேலு, திண்டிவனத்தில் இருந்து செஞ்சி வழியாக திருவண்ணாமலைக்கு முதல்வர் வருவதால் சாலை விரிவாக்கப் பணியை விரைவாக செய்ய உத்தரவிட்டார்.

அதன்படி இரவு, பகலாக இடைவிடாமல் சாலை விரிவாக்கப் பணிகள் நடக்கிறது.திண்டிவனம் முதல் கிருஷ்ணகிரி வரையிலான பணியை, தற்போது திருவண்ணாமலை வரை மட்டுமே விரைவுபடுத்தியுள்ளனர். அடுத்துள்ள பகுதியில் பணிகள் மந்த கதியிலேயே நடக்கிறது.இந்த பணிகளையும் துரிதப்படுத்த அமைச்சர் வேலு நடவடிக்கை எடுக்க வேண்டும் என்ற கோரிக்கை எழுந்துள்ளது.
சாலை விரிவாக்கப் பணியில் நகர பகுதிகள் இணைக்கவில்லை. இதனால் நகர சாலைகள் குண்டும் குழியுமாக இருந்தன. சில மாதங்களுக்கு முன் வரை நகாய் வசம் இருந்த நகர பகுதிகளை, தற்போது தேசிய நெடுஞ்சாலைத் துறையிடம் ஓப்படைத்துள்ளனர். இந்த சாலைகளும் டெண்டர் வைத்து புதுப்பிக்கும் பணி தற்போது நடந்து வருகிறது.
திண்டிவனம் முதல் செஞ்சி வரை சாலை போட்டு முடிந்த இடங்களில் சாலையின் மத்தியிலும், சாலை ஓரத்தில் 1 மீட்டர் இடைவெளியில் வெள்ளை பெயிண்ட் அடித்து வருகின்றனர்.பல இடங்களில் சாலையோரத்தில் 4 அடி வரை சாலையில் நீட்டிக்கொண்டு மரம், முட்செடிகள் வளர்ந்துள்ளன. அதை அகற்றாமல் அப்படியே வெள்ளைக் கோடு அடித்துள்ளனர். முட்செடிகள் இரவு நேரத்தில் வெள்ளை கோட்டுக்கு வெளியே செல்லும் இரு சக்கர வாகன ஓட்டிகளின் கண்களை பதம் பார்க்கும் அபாயம் உள்ளது.