Dinamalar

இடைநிலை பதிவு மூப்பு ஆசிரியர் சங்க மாநில பொது செயலர் ராபர்ட் வெளியிட்டுள்ள அறிக்கை: தமிழக பள்ளிக்கல்வி துறையில், 2009க்கு முன் நியமிக்கப்பட்ட இடைநிலை ஆசிரியர்களுக்கு, 8,370 ரூபாய்; அதன்பின் நியமிக்கப்பட்டோருக்கு, 5,200 ரூபாய் என, அடிப்படை ஊதியம் மாறுபாடாக நிர்ணயிக்கப்பட்டது.

இந்த முரண்பாட்டை சரி செய்யவும், சம வேலைக்கு சம ஊதியம் வழங்கவும் கோரி, 10 ஆண்டுகளுக்கும் மேலாக, இடைநிலை ஆசிரியர்கள் போராடி வருகின்றனர். 2018ல் நடந்த போராட்டத்துக்கு, தற்போதைய முதல்வர் ஸ்டாலின் ஆதரவு தெரிவித்து, ஊதிய முரண்பாட்டை களையும்படி, அப்போதைய அரசுக்கு அறிக்கை விடுத்தார்.இந்நிலையில், முதல்வர் ஸ்டாலின் தலைமையிலான ஆட்சி அமைந்து, ஒரு வருடமாகியும், ஆசிரியர்களின் ஊதிய முரண்பாடு கோரிக்கை நிறைவேற்றப்படவில்லை.

அதனால், இன்று முதல் வரும், 24ம் தேதி வரை, 'உங்கள் தொகுதியில் முதல்வர்' என்ற தனிப்பிரிவுக்கு, 20 ஆயிரம் இடைநிலை ஆசிரியர்கள் சார்பில், இ- - மெயில் வழியே, ஒற்றை கோரிக்கையுடன் மனுக்கள் அனுப்பப்பட உள்ளன.தமிழக முதல்வர், அமைச்சர்கள் மற்றும் கூட்டணி கட்சி தலைவர்களிடம் கோரிக்கைகளை எடுத்து செல்லும் வகையில், அடுத்த மாதம் சென்னையில் மாநாடும் நடத்தப்படும். காலாண்டு விடுமுறையில் செப்டம்பரில், 48 மணி நேர அடையாள உண்ணாவிரதம் நடத்தப்படும். அதற்கு பிறகும் கோரிக்கை ஏற்கப்படாவிட்டால், காலவரையற்ற போராட்டம் நடத்தப்படும்.இவ்வாறு அறிக்கையில் கூறியுள்ளனர்.