Dinamalar

கோவை : பசுமை சாம்பியன் விருது வழங்கியதில், தனிநபர் முன்னிலைப்படுத்தப்பட்டதாக, சர்ச்சை எழுந்துள்ளது.மாவட்ட அளவில் சுற்றுச்சூழல் பாதுகாப்பில் சிறப்பாக சேவையாற்றியவர்களுக்கு, தமிழக அரசு, பசுமை முதன்மையாளர் விருது (கிரீன் சாம்பியன்) வழங்கி வருகிறது.கடந்த ஜூன் 6ம் தேதி, கோவையில் மூன்று பேருக்கு, கலெக்டர் சமீரன் பசுமை முதன்மையாளர் விருது வழங்கினார்.

இதில், அத்தப்பகவுண்டன்புதுாரைச் சேர்ந்த தங்க வேலுக்கு விருது வழங்கப்பட்டதில் சர்ச்சை எழுந்துள்ளது. கிராம மக்கள் ஒன்றிணைந்து செய்த செயலுக்கு, தனிநபர் முன்னிலைப்படுத்தப்பட்டு, விருது வழங்கப்பட்டதாக புகார் எழுந்துள்ளது.இதுதொடர்பாக, நாராயணசாமி நாயுடு விவசாயிகள் சங்கத்தின், மாநில தலைவர் பாபு கூறுகையில், ''பசுமை அத்தப்பகவுண்டன்புதுார்' அமைப்பில், குளம் துார்வாருதல், பூங்கா அமைத்தல் என, ஊர் மக்கள் அனைவருமே இணைந்து செயல்படுகிறோம்.

அமைப்புக்கு விருது வழங்கப்படாமல், தனி நபர் முன்னிலைப்படுத்தப்பட்டு, விருது வழங்கப்பட்டுள்ளது,'' என்றார்.விருது பெற்ற தங்கவேலிடம் கேட்டபோது, “யாரோ ஒருவரை முன்னிலைப்படுத்தி விருது அளிக்க வேண்டும் என்ற நிலையில், நான் பெற்றிருக்கிறேன். உரிய சான்றுகளை வைத்துள்ளேன். விருதை தனிப்பட்ட ஆதாயத்துக்கு பயன்படுத்தப்போவதில்லை.

2010ம் ஆண்டிலிருந்து இந்த சேவையில் ஈடுபடுத்திக் கொண்டிருக்கிறேன். பரிசுத் தொகையை பசுமை மேம்பாட்டுக்கே செலவிடப்போகிறேன். விருதை தவறான முறையில் பெற்றதாகவோ, தவறாக பயன்படுத்தி விடுவேன் என கருதினாலோ, திருப்பிக் கொடுக் கவும் தயார்,” என்றார்.