Dinamalar

கடலுார் மாவட்டம், பண்ருட்டி அடுத்த சிறுதொண்டமாதேவி அம்மன் கோவில் தெருவைச்சேர்ந்தவர் செல்வகுமார், 48; விவசாயி. மாடியில் வசிக்கிறார். கீழ்தளத்தில் பெற்றோர் வசிக்கின்றனர். நேற்று முன்தினம் இரவு, வீட்டின் கதவை திறந்து வைத்துவிட்டு, செல்வகுமார் குடும்பத்தினருடன் பால்கனியில் துாங்கினார். பீரோ சாவியை ப்ரிட்ஜ் மீது வைத்திருந்தார்.

அதிகாலை 4:00 மணிக்கு செல்வகுமார் பார்த்தபோது, பீரோவில் இருந்த ரூ.10 லட்சம் மதிப்புள்ள 26 சவரன் தங்க நகைகள் மற்றும் 2 லட்சத்து 15 ஆயிரம் ரொக்கம் ஆகியவற்றை மர்ம நபர்கள் திருடி சென்றது தெரிய வந்தது. காடாம்புலியூர் போலீசில் செல்வகுமார் புகார் செய்தார். பண்ருட்டி டி.எஸ்.பி., சபியுல்லா, காடாம்புலியூர் போலீஸ் இன்ஸ்பெக்டர் ராஜதாமரைபாண்டியன் ஆகியோர் விசாரணை நடத்தினர்.
மோப்ப நாய் கூப்பர் வரவழைக்கப்பட்டது. மோப்ப நாய் வேகாக்கொல்லை சாலை வரை ஓடி நின்றது. தடய அறிவியல் நிபுணர் ஸ்ரீதர் தலைமையிலான குழுவினர், கைரேகை மற்றும் தடயங்களை சேகரித்தனர். காடாம்புலியூர் போலீசார் வழக்குப் பதிந்து, மர்ம நபர்களை தேடி வருகின்றனர்.