Dinamalar

கடலுார் மாவட்டம், பெண்ணாடம் திருமலை அகரத்தை சேர்ந்தவர் சண்முகம், 39; பெண்ணாடம் ஆரம்ப சுகாதார நிலையத்தில் ஒப்பந்த அடிப்படையில் டிரைவராக வேலை செய்கிறார்.இவரும், இவரது நண்பரான பெண்ணாமடம் ராணிமங்கம்மாள் வீதியை சேர்ந்த செந்தில்குமாரும் கூட்டாக சேர்ந்து வீட்டு உபயோகப் பொருட்களை வாங்கி வியாபாரம் செய்து வந்தனர்.
\தொழிலில் நஷ்டம் ஏற்பட்டதால், செந்தில்குமார், வேறு வேலைக்காக வெளியூர் சென்று உள்ளார். இந்நிலையில் சண்முகம், பெண்ணாடத்தில் இருந்த செந்தில்குமாரின் தாய் பவுனாம்பாளிடம், தன் பங்கு தொகையை கேட்டு அடிக்கடி தகராறு செய்து வந்தார்.

இது தொடர்பாக கடந்த 17ம் தேதி மீண்டும் இருவருக்கும் இடையே வாக்குவாதம் ஏற்பட்டது. ஆத்திரமடைந்த சண்முகம், அவரது மனைவி சாந்தி, தங்கை ரத்னா ஆகியோர் சேர்ந்து பவுனாம்பாளை இரும்பு கம்பியால் தாக்கினர்.படுகாயமடைந்த பவுனாம்பாள் திருச்சி தனியார் மருத்துவமனையில் சேர்ந்து சிகிச்சை பெற்று வந்தார்.
சண்முகம் உள்ளிட்ட மூவர் மீது பெண்ணாடம் போலீசார் வழக்கு பதிந்து விசாரித்து வந்தனர். இந்நிலையில், திருச்சி தனியார் மருத்துவமனையில் சிகிச்சை பெற்று வந்த பவுனாம்பாள் சிகிச்சை பலனின்றி இறந்தார். இதையடுத்து, ஏற்கனவே பதிவு செய்த வழக்கை, கொலை வழக்காக மாற்றம் செய்து சண்முகத்தை போலீசார் கைது செய்தனர். மேலும், தலைமறைவாக உள்ள சாந்தி, ரத்னா ஆகியோரை தேடி வருகின்றனர்.