Dinamalar

புதுச்சேரி : சென்டாக் தரவரிசை பட்டியலின் அடிப்படையில் அரசு இடஒதுக்கீட்டில் ஜிப்மர் மருத்துவ படிப்பிற்கான மாணவர் சேர்க்கையை நடத்த கவர்னர் உத்தரவிட கோரிக்கை விடுக்கப்பட்டுள்ளது.இதுகுறித்து சென்டாக் மாணவர் பெற்றோர் நலச்சங்கத் தலைவர் நாராயணசாமி, கவர்னர் தமிழிசைக்கு அனுப்பியுள்ள மனு:புதுச்சேரியில் 'நீட்' தேர்வு எழுதிய மாணவர்கள் மதிப்பெண் தரவரிசை பட்டியலை மாநில சுகாதாரத்துறைவெளியிட்டுள்ளது.

இந்தப்பட்டியலில் புதுச்சேரி மாநில மாணவர்கள் பெயர் விடுபட்டுள்ளது. ஆனால் வெளிமாநில மாணவர்களின் பெயர்கள் அதிக அளவில் உள்ளது.இந்தப் பட்டியலை வைத்து ஜிப்மர் மருத்துவ கல்லுாரியில், புதுச்சேரி மாணவர்களுக்கான இட ஒதுக்கீட்டில் முறைகேடாக இடம் பெறும் வாய்ப்புகளை வெளி மாநில மாணவர்கள் ஏற்படுத்திக் கொள்வர்.ஆகவே, சென்டாக் நிர்வாகமும், சுகாதாரத்துறையும், புதுச்சேரி அரசும் மாணவர்கள் நலன் கருதி சென்டாக் நிர்வாகம் வெளியிடும் தர வரிசை பட்டியலின் அடிப்படையில் மட்டுமே புதுச்சேரி மாநிலத்தில் அரசு இடஒதுக்கீட்டில் மருத்துவம் படிக்க மாணவர்களை தேர்வு செய்ய வேண்டும்.அதேப்போன்று, ஜிப்மர் கல்லுாரியில் மருத்துவப் படிப்பிற்கு புதுச்சேரிக்கான இட ஒதுக்கீட்டை சென்டாக் தரவரிசை அடிப்படையிலேயே மாணவர் சேர்க்கையை நடத்த வேண்டும்.இதுதொடர்பாக சுகாதாரத்துறையும், அரசும் எம்.சி.சி., நிர்வாகத்திற்கும், ஜிப்மர் நிர்வாகத்திற்கும் உடனடியாக பரிந்துரை கடிதம் அனுப்பவேண்டும்.இல்லையெனில், வெளிமாநில மாணவர்கள் புதுச்சேரி அரசு இட ஒதுக்கீட்டில் ஜிப்மர் மருத்துவக் கல்லுாரியில் மருத்துவம் படிக்கும் அவல நிலை ஏற்படும்.இவ்வாறு மனுவில் கூறப்பட்டுள்ளது.