Dinamalar

சென்னை,சென்னையில் மூன்றாவது நாளாக மழை பெய்து வரும் நிலையில் சாலையில் தேங்கிய மழைநீரை வெளியேற்றும் பணியில் தீவிரமாக இரவு, பகலாக, 19 ஆயிரத்து 500 துாய்மை பணியாளர்கள் ஈடுபட்டு வருகின்றனர். முதல்வரின் கொளத்துார் தொகுதி உட்பட வடசென்னையில் பல பகுதிகளில் மழைநீர் தேங்கி, மக்களின் இயல்பு நிலை முடங்கியுள்ளது.

வடமேற்கு பருவமழை தீவிரமடைந்துள்ளதை அடுத்து, சென்னையில் கடந்த மூன்று நாட்களில் பெரம்பூர் மாநகராட்சி பூங்கா பகுதியில் 17 செ.மீ., மாவட்ட ஆட்சியர் அலுவலக பகுதியில் 16 செ.மீ., சோழிங்கநல்லுார், அயனாவரம், அம்பத்துார், எம்.ஜி.ஆர். நகர், நுங்கம்பாக்கத்தில் தலா 13 செ.மீ., மழை பதிவாகியுள்ளது.

வட சென்னையில் 36 மணி நேரத்தில், 30 செ.மீ., மழை பதிவாகி உள்ளது. நவம்பர் மாதம் பெய்ய வேண்டிய 90 சதவீத மழை அளவை, வடசென்னை மூன்று நாட்களில் பெற்றுள்ளது. அப்பகுதிகளில், சராசரியாக 22 செ.மீ., மழை பெய்துள்ளது.

இதன் காரணமாக கொளத்துார் வெற்றி நகர், மந்தவெளி பேருந்து நிலையம், வில்லிவாக்கம் ஜனநாதன் தெரு, பெரம்பூர் பி.பி. சாலை, பட்டாளம் உள்ளிட்ட இடங்களில் தண்ணீர் தேங்கியுள்ளது.

தேங்கிய மழைநீரை வெளியேற்றும் பணிகளில் மாநகராட்சி கமிஷனர் ககன்தீப் சிங் பேடி உள்ளிட்ட அலுவலர்கள் 2,000 பேர், துாய்மை பணியாளர்கள் 19 ஆயிரத்து 500 பேர் இரவு, பகலாக ஈடுபட்டு வருகின்றனர். இதனால், பெரும்பாலான பகுதிகளில் மழைநீர் வடிந்துள்ளது. ஆனாலும், தொடர் மழையால் சில பகுதிகளில் வெள்ள நீர் சூழ்ந்துள்ளது.

சென்னையில் கடந்தாண்டு மழைநீர் தேங்கிய மாம்பலம், அசோக்நகர், தி.நகர் உள்ளிட்ட இடங்களில் பெரும்பாலான பகுதிகளில், இந்தாண்டு மழைநீர் தேங்கவில்லை. ஆனாலும், இந்த இடங்களில் உள்ள சில பகுதிகளை சூழ்ந்துள்ள மழைநீரை வெளியேற்றும் பணி தொடர்ந்து நடந்து வருகிறது.

சென்னை மாநகராட்சி தலைமை பொறியாளர் ராஜேந்திரன் கூறியதாவது:

சென்னையில் உள்ள மழைநீர் வடிகால்கள் 7 செ.மீ., நீரை உள்வாங்கும் திறன் கொண்டவை. அதைவிட அதிகமாக மழை பெய்தால், மழைநீர் வடிய இரண்டு மணி நேரமாவது தேவைப்படுகிறது. புதிதாக கட்டப்பட்ட மழைநீர் வடிகால்களில் மழைநீர் சீராக செல்கிறது. சில பிரதான சாலைகள், உட்புற சாலைகளில் மட்டுமே மழைநீர் தேக்கம் உள்ளது.

அந்த பகுதிகளில், நீர் கடைசியாக சென்று சேரக்கூடிய நீர்நிலைகளில், நீர் உள்வாங்குவதில் தாமதம் ஏற்படுகிறது. அந்த இடங்களில் எல்லாம், மோட்டார் பம்புகள் வாயிலாக மழைநீர் அகற்றும் பணி நடந்து வருகிறது.

தற்போது, மழைநீரை வெளியேற்றும் பணிகளில் அலுவலர்கள் மற்றும் துாய்மை பணியாளர்கள் ஈடுபட்டு வருகின்றனர். மேலும், பழைய சென்னை மாநகராட்சி வார்டுகளுக்கு தலா பத்து பணியாளர்கள், விரிவாக்கப்பட்ட வார்டுகளில் தலா ஐந்து பணியாளர்கள் கூடுதலாக நியமிக்கப்பட்டுள்ளனர். இவர்கள் மழைக்காலம் முடியும் வரை, மழைநீர் வெளியேற்றும் பணிகளில் ஈடுபடுவர்.

• 1.கிளாம்பாக்கம் சூழலியல் பூங்கா அவசியமா? 20 நிபந்தனைகள் விதித்தது தொல்லியல் துறை
• 2.ரேடியல் - கிழக்கு கடற்கரை சாலை இணைப்பில் இழுபறி: நிலம் வழங்க முன்வராததால் அதிகாரிகள் திணறல்
• 3. காவல் உதவி மையங்கள் செயல்படாததால் அவதி
• 4. நேப்பியர் முகத்துவாரத்தில் நட்சத்திர கற்கள் குவிப்பு
• 5. 'உதயம்' தியேட்டர் 'மாஜி' உரிமையாளர் கைது
• 6. கோவிலில் ரூ.31.66 லட்சம் காணிக்கை
• 7. ஓய்வு பெற்ற மருத்துவரிடம் லஞ்சம் பெற்றவர் கைது
• 8. 'உதயம்' தியேட்டர் 'மாஜி' உரிமையாளர் 'செக்' வழக்கில் கைது
• 9. கடற்படையில் மீனவர்கள் சேர சைலேந்திர பாபு விருப்பம்
• 10. பாலியல் தொழில் புரோக்கர் கைது