Dinamalar

மயிலாடுதுறை: சீர்காழி அருகே பதுக்கி வைக்கப்பட்டிருந்த 980 லிட்டர் சாராயத்தை பறிமுதல் செய்த மத்திய புலனாய்வு பிரிவு போலீசார் இருவரை கைது செய்துள்ளனர்.
மயிலாடுதுறை மாவட்டத்தில் பரவலாக புதுச்சேரி மாநில சாராயம் மற்றும் குறைந்த விலை மதுபான பாட்டில்கள் விற்பனை செய்யப்படுகின்றன. டாஸ்மாக் கடை விடுமுறை நாட்களில் புதுச்சேரி மாநிலம் காரைக்கால் பகுதியில் இருந்து கடத்தி வரப்படும் பாண்டி சாராயம் மற்றும் குறைந்த விலை மதுபானங்கள் அதிக அளவில் விற்பனை செய்யப்படுகின்றன.
சோதனை சாவடிகள் மற்றும் மதுவிலக்கு அமலாக்க பிரிவு போலீசார் பணியில் இருந்தும் பாண்டி சாராயம் மற்றும் குறைந்த விலை மதுபான விற்பனையை போலீசாரால் கட்டுப்படுத்த முடியவில்லை. இந்நிலையில் சீர்காழி தாலுக்கா திருமுல்லைவாசலில் குடியரசு தின விடுமுறையை பயன்படுத்தி விற்பனை செய்வதற்காக பாண்டி சாராயம் பதுக்கி வைக்கப்பட்டிருப்பதாக திருச்சி மத்திய புலனாய்வு பிரிவு போலீசாருக்கு தகவல் கிடைத்துள்ளது.

இதனை அடுத்து திருமுல்லைவாசலுக்கு விரைந்து வந்த சப்-இன்ஸ்பெக்டர் பாண்டியன் தலைமையிலான போலீசார் பிரபல சாராய வியாபாரியான திருமலைவாசல் காமராஜ் நகர் மாறன் மனைவி லட்சுமி.49. என்பவர் வீட்டில் சோதனை செய்ய நடத்தினர். சோதனையின் போது காம்பவுண்ட் சுவர் அருகே 35 லிட்டர் கொள்ளளவு உள்ள 25 கேம்களில் 805 லிட்டர் மற்றும் 35 மூட்டைகளில் 1750 பாக்கெட்டுகளின் நிரப்பப்பட்ட 175 லிட்டர் என மொத்தம் 980 லிட்டர் பாண்டி சாராயம் மண்ணில் புதைத்து வைக்கப்பட்டிருந்தது தெரியவந்தது.
பிடிபட்ட பாண்டி சாராயத்துடன் மூன்று மடங்கு தண்ணீர் கலந்து விற்பனை செய்யப்படும் எனக் கூறப்படுகிறது. இதனை அடுத்து சாராயத்தை கைப்பற்றி செய்த மத்திய புலனாய்வு பிரிவு போலீசார் பிரபல சாராய வியாபாரி லட்சுமி மற்றும் அவரிடம் சாராய வியாபாரம் செய்த பாரதி.42. இருவரையும் பிடித்து மதுவிலக்கு அமலாக்க பிரிவு போலீசாரிடம் ஒப்படைத்தனர். இது குறித்து வழக்கு பதிந்த சீர்காழி மதுவிலக்கு அமலாக்க பிரிவு போலீசார் சாராயத்தை கைப்பற்றி, வியாபாரிகள் இருவரையும் கைது செய்து விசாரணை நடத்தி வருகின்றனர்.