Dinamalar

மதுரை பெரியார் பஸ் நிலையம் ரயில்வே கேட் அருகில் 1.81 ஏக்கர் பரப்பளவில் ஹிந்து அறநிலைய துறைக்கு சொந்தமான வலைவீசி தெப்பக்குளம் மற்றும் காளக்கோவில் என்ற கோயிலும் இருந்தது.

கொரோனாவிற்கு முன்புவரை அங்கு ஆண்டுதோறும் தை மாதம் கோயிலில் இருந்து சிவபெருமான் - மீனாட்சி அம்மன் ஊர்வலமாக இந்த வலைவீசி தெப்பக்குளம் வந்து மீன் பிடித்து திரும்பி கோவிலுக்கு புறப்பட்டு செல்லும் திருவிளையாடல் நிகழ்வு நடைபெற்றது. இதில் லட்சக்கணக்கான பக்தர்கள் பங்கேற்பர்.

ஆனால் மூன்று ஆண்டுகளாக இந்நிகழ்வு நடக்காததால் அங்கிருந்த தெப்பக்குளத்தை காணவில்லை. அங்கே இருந்த சிவன், நந்தி, விநாயகர் சிலைகளையும் காணவில்லை. இதனால் பக்தர்கள் கடும் அதிர்ச்சியடைந்துள்ளனர்.

இந்தாண்டு வலைவீசி திருவிழா நடத்த அந்த இடத்தில் முகூர்த்த கால் ஊன்ற அறநிலைய துறை அதிகாரிகள் சென்றபோது தான் தெப்பக்குளம் மாயமான விஷயம் தெரிந்து திகைத்த அதிகாரிகள், மீன்பிடி திருவிழாவை மீனாட்சி அம்மன் கோயில் வளாகத்திற்குள்ளேயே நடத்தியுள்ளனர். எனவே காணாமல் போன தெப்பக்குளம், சிலைகளை கண்டுபிடித்து பழமை மாறாமல் மீண்டும் வழிபாட்டிற்கு வைக்க வேண்டும்.

இவ்வாறு குறிப்பிடப்பட்டுள்ளது. இதுகுறித்து போலீசார் விசாரணையை துவக்கியுள்ளனர்.