Dinamalar

குளித்தலை: குளித்தலை அடுத்த, தோகைமலை யூனியனில், கடந்த, 2020ம் ஆண்டு நடந்த ஊரக உள்ளாட்சி தேர்தலில், 15 யூனியன் கவுன்சிலர்களில், அ.தி.மு.க.,-10, பா.ஜ.,-1 என கூட்டணியை சேர்ந்த, 11 பேரும், தி.மு.க., சார்பில், 4 பெரும் வெற்றி பெற்றனர். தோகைமலை யூனியன் குழு தலைவராக, அ.தி.மு.க.,வை சேர்ந்த லதா ரங்கசாமி தேர்ந்தெடுக்கப்பட்டார்.
2021ல் ஆட்சி மாற்றம் ஏற்பட்ட பின், அ.தி.மு.க.,வை சேர்ந்த யூனியன் குழு துணை தலைவர் உட்பட கவுன்சிலர்கள், 8 பேர், தி.மு.க.,வில் இணைந்தனர். இதனால் தோகைமலை யூனியனில், தி.மு.க., பலம், 12 ஆக கூடியது.

தொடர்ந்து, தி.மு.க., யூனியன் கவுன்சிலர் லதாவேலுசாமி, அ.தி.மு.க.,வில் இணைந்து கொண்டார். தற்போது தி.மு.க.,வின் பலம், 11 ஆகவும், அ.தி.மு.க., கூட்டணி பலம் நான்காகவும் உள்ளது. நேற்று மதியம், குளித்தலை ஆர்.டி.ஓ., புஷ்பாதேவியிடம், தி.மு.க., கவுன்சிலர்கள் மனு அளித்தனர்.
அதில் அவர்கள் கூறியிருப்பதாவது: தோகைமலை யூனியன் குழு தலைவரின் கணவரும், அ.தி.மு.க., தோகைமலை மேற்கு ஒன்றிய செயலாளருமான ரங்கசாமி அரசு பணிகளில், தலையிட்டு வருகிறார். பல்வேறு ஒப்பந்தங்களில் முறைகேட்டில் ஈடுபட்டுள்ளார். மேலும், அரசு அதிகாரிகளுக்கு மிரட்டல் விடுக்கிறார்.
இதை தட்டி கேட்கும் யூனியன் கவுன்சிலர்களை ஆட்களை வைத்து மிரட்டுகிறார். எனவே, தோகைமலை ஒன்றிய குழு தலைவர் லதா ரங்கசாமியை பதவியில் இருந்து நீக்க, வரும் யூனியன் குழு கூட்டத்தில் நம்பிக்கையில்லா தீர்மானம் கொண்டுவர வேண்டும். இவ்வாறு மனுவில் கூறியுள்ளனர். அதை பெற்றுக் கொண்ட, ஆர்.டி.ஓ., 'உரிய விசாரணை செய்தபின் நடவடிக்கை எடுக்கப்படும்' என, கூறினார்.

வருங்காலத்தை ஆளப்போகும் தொழில்நுட்பங்கள் எவை?
தினமலர் வழிகாட்டி 2023 - அனுமதி இலவசம்