Dinamalar

இதில் ஆயிரக்கணக்கான பக்தர்கள் பங்கேற்று சுவாமியை தரிசனம் செய்தனர்.

எருமப்பட்டி யூனியன், பொட்டிரெட்டிபட்டி பஞ்.,ல் பொங்கல் பண்டிகையையொட்டி ஆண்டு தோறும் ஜல்லிக்கட்டு போட்டி நடத்தப்பட்டு வருகிறது. இந்தாண்டு ஜல்லிக்கட்டு போட்டி நடத்த மாவட்ட நிர்வாகத்திடம் மனு கொடுத்திருந்த நிலையில், கடந்த சில தினங்களுக்கு முன் ஜல்லிக்கட்டு நடத்தப்படும் இடத்தை ஆர்.டி.ஓ., மஞ்சுளா பார்வையிட்டு சென்றார். இதையடுத்து அந்த இடத்தில் வாடிவாசல் அமைப்பதற்கான பூமி பூஜை பஞ்., தலைவர் துளசிராமன் தலைமையில், நேற்று நடந்தது. இதில், 'அட்மா' குழு தலைவர் பாலசுப்பரமணியன் கலந்து கொண்டு, பூமிபூஜை செய்து பணியை துவக்கி வைத்தார். நிகழ்ச்சியில் ஊர் முக்கியஸ்தர்கள் கலந்து கொண்டனர்.

திருமலை நாயக்கர்
440வது ஜெயந்தி விழா
மாமன்னர் திருமலை நாயக்கரின், 440 ஜெயந்தி விழா, மாவட்ட நாயுடு இளைஞர் அணி சார்பில், நாமக்கல்லில் கொண்டாடப்பட்டது. மாவட்ட தலைவர் சக்தி வெங்கடேஷ் தலைமை வகித்தார். நகர தலைவர் ரஞ்சித் வரவேற்றார். மாவட்ட நாயுடு நல சங்க செயலாளர் நாராயணன், மாவட்ட பொருளாளர் தங்கவேல் ஆகியோர் முன்னிலை வகித்தனர்.
விழாவை முன்னிட்டு, நாமக்கல்-மோகனுார் சாலை அண்ணாதுரை சிலை அருகில், அலங்கரித்து வைக்கப்பட்டிருந்த திருமலை நாயக்கரின் படத்துக்கு மலர் துாவி மரியாதை செலுத்தினர். தொடர்ந்து, விழாவுக்காக மதுரை சென்றவர்களுக்கு, வழியனுப்பு விழா நடந்தது. சங்க நிர்வாகிகள், உறுப்பினர்கள் உள்பட பலர் பங்கேற்றனர்.

270 கிலோ ரேஷன் அரிசி
பதுக்கிய முதியவர் கைது
நாமக்கல் புதுச்சத்திரம் அடுத்த கதிராநல்லுார் தொடக்க வேளாண் கூட்டுறவு சங்கம் அருகே, ரேஷன் அரிசி மூட்டைகள் பதுக்கி வைத்திருப்பதாக, நாமக்கல் குடிமைபொருள் வழங்கல் குற்ற புலனாய்வுத்துறை போலீசாருக்கு தகவல் கிடைத்தது. இதையடுத்து, எஸ்.ஐ., சதீஸ்குமார் தலைமையிலான போலீசார், சம்பந்தப்பட்ட இடத்தில் திடீரென சோதனை மேற்கொண்டனர். அப்போது, மாரிமுத்து, 66, என்ற முதியவர் ரேஷன் அரிசி பதுக்கி வைத்திருந்தது கண்டுபிடிக்கப்பட்டது. 270 கிலோ ரேஷன் அரிசியை பறிமுதல் செய்த போலீசார், மாரிமுத்துவை கைது செய்து விசாரிக்கின்றனர்.

செயின் திருடர்களை
பிடிக்க தனிப்படை
சேந்தமங்கலம் அடுத்த மின்னாம்பள்ளியை சேர்ந்தவர் சவுந்தர்யா, 39; கடந்த, 3ல் டூவீலரில் அண்ணா நகர் மேம்பாலத்தில் சென்று
கொண்டிருந்த போது, பைக்கில் முகமூடி அணிந்து வந்த, 3 மர்ம நபர்கள் சவுந்தர்யாவின் கழுத்தில் அணிந்திருந்த, 10 பவுன் தாலிக்கொடியை பறித்துக் கொண்டு தப்பிச் சென்றனர்.
சேந்தமங்கலம் இன்ஸ்பெக்டர் கோவிந்தராசன் வழக்குப்பதிவு செய்து விசாரணை நடத்தி வருகிறார். இந்நிலையில், நாமக்கல் எஸ்.பி., கலைச்செல்வன் உத்தரவுப்படி, டி.எஸ்.பி., சுரேஷ் மேற்பார்வையில் தனிப்படை அமைக்கப்பட்டு, மர்ம நபர்களை தீவிரமாக தேடி வருகின்றனர்.

புலிமலை முருகனுக்கு
சந்தன காப்பு அலங்காரம்
சேந்தமங்கலம் அடுத்த ஆர்.பி., புதுாரில் பிரசித்தி பெற்ற பழமை வாய்ந்த புலிமலை முருகன் கோவில், 1,000 அடி உயரத்தில் அமைந்துள்ளது. தைப்பூசத்தை முன்னிட்டு புலிமலை முருகனுக்கு மஞ்சள், திருமஞ்சனம், பால், தயிர், இளநீர், விபூதி, பஞ்சாமிர்தம் உள்ளிட்ட பல்வேறு அபிஷேகங்கள், சிறப்பு ஆராதனைகள் நடந்தன.
புலிமலை முருகன் சந்தன காப்பு அலங்காரத்தில் பக்தர்களுக்கு அருள்பாலித்தார். சுற்றுவட்டார பகுதிகளில் இருந்து ஏராளமான பக்தர்கள் புலிமலை உச்சிக்கு சென்று முருகனை வழிபட்டனர்.

ஆண்கள் மட்டும்
பங்கேற்ற கறி விருந்து
நாமகிரிப்பேட்டை அடுத்த, ஆர்.புதுப்பட்டியை ஒட்டியுள்ள போதமலை தொடர்ச்சியில் பிரசித்தி பெற்ற கள்ளவழி கருப்பணார் கோவில் உள்ளது. மலைவாழ் மக்களுக்கான இந்த கோவிலில், ஆண்கள் மட்டுமே சென்று வழிபாடு செய்வது வழக்கம். நேற்று மாலை, 4:00 மணிக்கு சமாபந்தி விருந்துக்கான பூஜைகள் தொடங்கின. இதில், 46 ஆட்டு கிடா, 22 பன்றிகள், 22 சேவல்கள் பலியிட்டு முப்பூஜை செய்யப்பட்டது. தொடர்ந்து பசிறுமலை அடிவாரத்தில் உள்ள வயலில் சமபந்தி விருந்துக்கான சமையலை, 50க்கும் மேற்பட்ட ஆண்கள் மட்டுமே செய்தனர். 2,320 கிலோ கறி சமைக்கப்பட்டது. இதில், 2,000க்கும் மேற்பட்டோர் கலந்து கொண்டு விருந்து சாப்பிட்டு
சென்றனர்.

நிலா பிள்ளையார்
கும்மியடி திருவிழா
குமாரபாளையத்தில், 16ம் ஆண்டு நிலா பிள்ளையார் கும்மியடி திருவிழா நடந்தது. குமாரபாளையம், வேதாந்தபுரம் எம்பெருமாள் குடியிருப்பு பகுதியில் ஆண்டுதோறும் கும்மியடி திருவிழா நடப்பது வழக்கம். 16வது ஆண்டாக நிலா பிள்ளையார் கும்மியடி திருவிழா நேற்று கொண்டாடப்பட்டது. கவுன்சிலர் கோவிந்தராஜன் தலைமை வகித்தார். சேர்மன் விஜய்கண்ணன், நிர்வாகிகள் செல்வராஜ், செந்தில்குமார், ஐயப்பன் உள்பட பலர் கலந்துகொண்டனர்.

செல்வ சுப்பிரமணிய
சுவாமிக்கு கும்பாபிஷேகம்
மல்லசமுத்திரம் அருகே, அக்கரைப்பட்டி கிராமத்தில் உள்ள பிரசித்திபெற்ற செல்வநாயகி அம்மன் உடனமர் செல்வலிங்கேஸ்வரர் ஆலயம் உள்ளது. அதில் புதிதாக நிறுவப்பட்டுள்ள செல்வ சுப்பிரமணியர், வள்ளி தெய்வானை சுவாமிக்கு நேற்று காலை, 8:00 மணிக்கு, புனிதநீர் உற்றி மகா கும்பாபிஷேகம் நடந்தது. தொடர்ந்து, வள்ளி, தெய்வானை திருக்கல்யாண வைபவம் நடந்தது. ஏற்பாடுகளை, கோவில் நிர்வாகிகள் செய்திருந்தனர்.

யோகாவில் உலக சாதனை
குமாரபாளையத்தில் யோகாசன கின்னஸ் சாதனை நிகழ்ச்சி நடந்தது.
தமிழ்நாடு யோகா கூட்டமைப்பு சார்பில் உலக சாதனை யோகா போட்டி நடத்தபட்டது. பொது செயலர் அரவிந்தன், போட்டி ஒருங்கிணைப்பாளர் மதுமிதா தலைமை வகித்தனர். நாமக்கல், ஈரோடு, சேலம், கோவை, திருநெல்வேலி, கடலுார், சென்னை உள்ளிட்ட பல பகுதியிலிருந்து, மூன்று வயதிலிருந்து, 30 வயது வரையிலான, 300 நபர்கள் பங்கேற்றனர். ஒரே இடத்தில் வட்டையாசனம் எனப்படும் யோகாசனம் தொடர்ந்து, 5 நிமிடங்கள் செய்யும் உலக சாதனை நிகழ்ச்சி நடந்தது. 'நோபல் வோர்ல்டு ரெக்கார்டு' அமைப்பினர் இதனை அங்கீகரித்தனர். தேசிய அளவில் யோகாவில் தங்கப்பதக்கம் வென்ற போட்டி ஒருங்கிணைப்பாளர் மதுமிதாவிற்கு சிறந்த நிகழ்ச்சி ஒருங்கிணைப்பாளர் விருது வழங்கப்பட்டது.