Dinamalar

கோபி,-கோபி அருகே பாரியூர் சாலையில் உள்ள சாணார்பதியில், நுாற்றுக்கும் மேற்பட்ட குடும்பத்தினர் வசிக்கின்றனர். வெள்ளாளபாளையம் பிரிவு அருகே செல்லும் கீரிப்பள்ள ஓடையை கடந்துள்ள சுடுகாட்டை, இவர்கள் பயன்படுத்தி வருகின்றனர். இதற்காக ஓடையின் குறுக்கே கட்டப்பட்டிருந்த தரைமட்ட பாலம், பத்தாண்டுக்கு முன் சேதமடைந்ததால் இடித்து அகற்றப்பட்டது. அதன்பின் பாலம் கட்டாததால், உடலை கொண்டு செல்ல முடியாமல் மக்கள் அவதியுறுகின்றனர். ஓடைக்குள் இறங்கி, இடுப்பளவு சேற்றுக்குள் உடலை சுமந்து கொண்டு செல்லும் நிலை தொடர்கிறது. ஒரு சிலர் சொந்த செலவில், ஓடையின் குறுக்கே தற்காலிக பாலம் அமைத்து, உடலை அடக்கம் செய்து வருகின்றனர். உயர்மட்ட பாலம் அமைக்க, பல ஆண்டுகளாக மக்கள் போராடி வந்த நிலையில், பொதுப்பணித்துறை சார்பில், 1.50 கோடி ரூபாயில் உயர்மட்ட பாலம் கட்ட, விரைவில் பணி தொடங்கவுள்ளது. இதற்கான பூர்வாங்க பணியாக, ஓடையின் அருகே மண் மேட்டை சமன் செய்யும் பணி தற்போது நடக்கிறது.