Dinamalar

அந்தியூர், ஓலகடம் அருகே ராஜகுமாரனுார் பகுதியில், 300க்கும் மேற்பட்ட குடும்பத்தினர் வசிக்கின்றனர். இவர்களின் குலதெய்வமான எல்லம்மன், மாரியம்மன், கரியகாளியம்மன் சுவாமிகளுக்கு ஊருக்குள் நடுவே கோவில் கட்டி வழிபட்டு வருகின்றனர். கோவில் பட்டக்காரர் மாதப்பன், கடந்த ஆண்டு இறந்து விட்டார். அந்த பொறுப்பு காலியாக இருந்தது. அந்த இடத்துக்கு புதியவரை தேர்வு செய்ய ஊர்மக்கள் முடிவு செய்தனர்.
கோவிலை பொறுத்தவரை பரம்பரை, பரம்பரையாக இல்லாமல் சாமி அருள் பெற்றவரே நிர்வாகியாக வரமுடியும். இதனால் கோவில் நடைமுறைப்படி, நேற்று அதிகாலை கோவிலுக்கு அருகே உள்ள மைதானத்தில், தீ மூட்டி சுவாமிக்கு தீபாராதனை காட்டப்படும் துாபக்கால் வைக்கப்பட்டது.

கொளுந்து விட்டு எரிந்த தீயில் துாபக்கால் சிவந்து போனது. அந்த துாபக்காலை கையால் எடுத்து, சுவாமிக்கு ஆராதனை செய்பவருக்கு மட்டுமே, பட்டக்காரர் பதவி கிடைக்கும். இதன்படி அதே பகுதியை சேர்ந்த வடிவேலு, துாபக்காலை கையில் எடுத்து கோவிலுக்கு சென்று ஆராதனை செய்தார். இதை தொடர்ந்து கோவில் பட்டக்காரராக அவர் தேர்வு செய்யப்பட்டதாக அறிவிக்கப்பட்டது. அவர் பொறுப்பேற்றுக் கொண்டார். கோவில் குண்டம் விழா வரும் 12ம் தேதி நடக்கவுள்ளதாக, கிராம மக்கள் தெரிவித்தனர்.