Dinamalar

சாய் தபோவனத்தில் வைகாசி
வியாழன் சிறப்பு ஆரத்தி
நாமக்கல்-பரமத்தி சாலையில் உள்ள வள்ளிபுரம் அடுத்த தொட்டிப்பட்டி, ஷீரடி சாய்பாபா சாய் தபோவனத்தில், வைகாசி மாதம் நான்காவது வியாழனை முன்னிட்டு சிறப்பு ஆரத்தி மற்றும் அலங்காரம் செய்யப்பட்டது.
நேற்று அதிகாலை, சாய்பாபாவிற்கு பல்வேறு திரவியங்களால் சிறப்பு அபிஷேகம் செய்யப்பட்டு, காக்கட் என்னும் ஆரத்தி நடந்தது. தொடர்ந்து, பக்தர்கள் கொண்டு வந்த மலர்களால் சிறப்பு அலங்காரம் செய்யப்பட்டது. பின், பாபாவின் பஜனை நிகழ்ச்சி நடந்தது. மதியான் ஆரத்தி பாடப்பட்டு, வேதங்கள் முழங்க பாபாவிற்கு மகா தீபாராதனை காண்பிக்கப்பட்டது. சுற்றுவட்டாரத்தை சேர்ந்த பக்தர்கள் சுவாமி

தரிசனம் செய்தனர்.

டூவீலரிலிருந்து விழுந்தவர் பலி
குமாரபாளையம், கல்லங்காட்டுவலசு பகுதியில் வசிப்பவர் கணேசன், 62, கூலித்தொழிலாளி. இவர் மே, 19ல் டி.வி.எஸ். மொபட்டில் கோட்டைமேடு அருகே, சர்வீஸ் சாலையில் வந்தபோது நிலை தடுமாறி கீழே விழுந்து பலத்த காயமடைந்தார். சேலம் அரசு மருத்துவமனையில் சேர்க்கப்பட்ட இவர் நேற்றுமுன்தினம் இறந்தார். குமாரபாளையம் போலீசார் விசாரணை நடத்தி வருகின்றனர்.

பசு மாட்டை திருடிய
இருவருக்கு காப்பு
எருமப்பட்டியில், மாட்டு கொட்டகையில் கட்டி வைத்திருந்த பசு மாட்டை திருடிய இருவரை போலீசார் கைது செய்தனர்.
எருமப்பட்டி, காந்திரோட்டைசேர்ந்தவர் முருகேசன், 48 விவசாயி. இவர் கடந்த, 7ல் வீட்டின் அருகில் இருந்த மாட்டு கொட்டகையில், பசு மாடு கட்டி வைத்துள்ளார். மறுநாள் பார்த்த போது பசுமாடு காணாமல் போனது. இதையடுத்து, கோணங்கப்பட்டி ‍‍ரோட்டில் தேடி சென்றுள்ளார். அப்போது எருமப்பட்டி ஜீவாநத்தம் தெருவை சேர்ந்த சந்திரசேகரன், 23, பழனி நகரை சேர்ந்த விக்னேஷ்வரன், 19 ஆகியோர் மாட்டை ஓட்டியபடி சென்றனர். முருகேசன் புகார்படி, எருமப்பட்டி போலீசார் விசாரித்து சந்திரசேகரன், விக்னேஷ்வரன் ஆகியோரை கைது செய்ததுடன், பசு பாட்டை பறிமுதல் செய்தனர்.

பள்ளிபாளையம் நகராட்சியை
தரம் உயர்த்த கோரிக்கை
பள்ளிபாளையம், 2003 வரை டவுன் பஞ்., பகுதியாக இருந்தது. 2004ல், மூன்றாம் நிலை நகராட்சி, 2011ல், இரண்டாம் நிலை நகராட்சியாக தரம் உயர்த்தப்பட்டது. தற்போது நகராட்சி பகுதியில் தொழிற்கூடம், வர்த்தக நிறுவனங்கள் அதிகரித்து வளர்ந்து வரும் நகரமாக உள்ளது.
கடந்தாண்டு நகர மன்ற கூட்டத்தில், நகராட்சி அருகில் உள்ள ஆலாம்பாளையம் டவுன் பஞ்., மற்றும் சில பஞ்., பகுதிகளை இணைத்து, தரம் உயர்த்த தீர்மானம் நிறைவேற்றப்பட்டன. இப்பணி தொய்வு நிலையில் இருந்து வந்தது. இந்நிலையில் நகராட்சி சேர்மன் செல்வராஜ், நேற்று மாவட்ட கலெக்டரை சந்தித்து தரம் உயர்த்த கோரிக்கை வைத்துள்ளார்.
இது குறித்து, பள்ளிபாளையம் நகராட்சி சேர்மன் செல்வராஜ் கூறுகையில்,''நாமக்கல் கலெக்டரை நேரில் சந்தித்து, பள்ளிபாளையம் நகராட்சியை தரம் உயர்த்த வேண்டும் உள்ளிட்ட பல கோரிக்கைகளை வைத்துள்ளேன்,'' என்றார்.

மின்மாற்றிகளை மாற்ற
மக்கள் நீதி மய்யம் மனு
குமாரபாளையத்தில், மதீனா ஸ்டோர் அருகில் மின்மாற்றி உள்ளது. இதனால் பயணிகள் சாலையை கடக்கும்போதும், வாகனங்கள் செல்லும் போதும் ஒதுங்க இடமின்றி தவித்து வருகின்றனர். இந்த இடத்தில் விபத்துகளும் நடந்துள்ளன. இதேபோல் ஆனங்கூர் பிரிவு சாலையில் உள்ள மின்மாற்றியையும் மாற்றியமைக்க வேண்டும் என, மக்கள் நீதி மய்ய மகளிரணி நகர அமைப்பாளர் சித்ரா தலைமையில், திருச்செங்கோடு நெடுஞ்சாலைத்துறை உதவி பொறியாளர் திருகுணாவிடம் மனு வழங்கப்பட்டது.

தேங்காய் பருப்பு ஏலம்
ப.வேலுார், வெங்கமேட்டில் உள்ள மின்னணு தேசிய வேளாண்மை சந்தையில் நேற்று நடந்த ஏலத்திற்கு, 11 ஆயிரம் கிலோ தேங்காய் பருப்பை விவசாயிகள் கொண்டு வந்தனர். இதில் அதிகபட்சமாக கிலோ, ரூ.79.89, குறைந்தபட்சமாக, ரூ.63.79, சராசரியாக, ரூ.73.70-க்கு ஏலம் போனது. மொத்தம் ஏழு லட்சத்து, 92 ஆயிரம் ரூபாய்க்கு வர்த்தகம் நடந்தது.

சாலை பணிகள் துவக்க விழா
சேந்தமங்கலம் யூனியனுக்கு உட்பட்ட, கொண்டமநாயக்கன்பட்டி பஞ்.,ல், ரூ.1.20 கோடி மதிப்பில் சாலை மேம்பாட்டு திட்டப்பணிகள் துவக்க விழா நடந்தது. அட்மா குழு தலைவர் அசோக்குமார் தலைமை வகித்தார். எம்.பி., ராஜேஷ்குமார், எம்.எல்.ஏ., பொன்னுசாமி ஆகியோர், கொண்டமநாயக்கன்பட்டியில் ரூ.1.20 கோடி மதிப்பில் சாலை மேம்பாட்டு திட்ட பணிகளை துவக்கி வைத்தனர். யூனியன் சேர்மன் மணிமாலா, பஞ்., தலைவர் வெங்கடேஸ்வரி உட்பட பலர் பங்கேற்றனர்.

மளிகை கடையில் மது விற்ற
தி.மு.க.,கிளை செயலர் கைது
மோகனுார் அருகே, மளிகை கடையில் கள்ளத்தனமாக மது விற்ற, தி.மு.க., கிளை செயலரை போலீசார் கைது செய்தனர்.
நாமக்கல் மாவட்டத்தில், எஸ்.பி.,ராஜேஸ்கண்ணன் உத்தரவின்படி, கள்ளச்சாராய வேட்டையில் போலீசார் சோதனையில் ஈடுபட்டு வருகின்றனர். மோகனுார் அடுத்த ஆண்டாபுரம் பகுதியில், மோகனுார் எஸ்.ஐ., சிவக்குமார் தலைமையிலான போலீசார் நேற்று சோதனை மேற்கொண்டனர். அப்போது, அப்பகுதியில் மளிகை கடை நடத்தி வரும், தி.மு.க, கிளை செயலர் குமரவேல், 42 தன் கடையில், மதுபாட்டில்களை மறைத்து விற்பனை செய்து வந்தது தெரியவந்தது. அவரை கைது செய்த போலீசார், மளிகை கடையில் இருந்து குவார்ட்டர் பாட்டில்களை பறிமுதல் செய்தனர்.

நெடுஞ்சாலை துறை சார்பில்
12,000 மரக்கன்று நடும்பணி
நெடுஞ்சாலைத்துறை சார்பில், கருணாநிதி நுாற்றாண்டு விழாவை முன்னிட்டு, 12,000 மரக்கன்றுகள் நடும்பணியை அமைச்சர்கள் தொடங்கி வைத்தனர்.
முன்னாள் முதல்வர் கருணாநிதியின் நுாற்றாண்டு விழாவை முன்னிட்டு, அனைத்து மாநில நெடுஞ்சாலைகளிலும், 5 லட்சம் மரக்கன்றுகள் நடப்படும் என்று அறிவிக்கப்பட்டது. இதையடுத்து, சென்னை கிண்டியில் உள்ள நெடுஞ்சாலை ஆராய்ச்சி நிலைய வளாகத்தில், மரக்கன்றுகள் நடும் திட்டத்தை, முதல்வர் ஸ்டாலின் தொடங்கி வைத்தார்.
நாமக்கல் நெடுஞ்சாலை கோட்டம் சார்பில், 12,000 மரக்கன்றுகள் நடும் பணியை, திருச்செங்கோடு பயணியர் மாளிகையில் அமைச்சர்கள் நேரு, மதிவேந்தன் ஆகியோர் தொடங்கி வைத்தனர். திருச்செங்கோடு எம்.எம்.எல்., ஈஸ்வரன், திருச்செங்கோடு ஜல்லிக்கட்டு பேரவை தலைவர் மதுரா செந்தில் ஆகியோர் முன்னிலை வகித்தனர்.
நாமக்கல் நெடுஞ்சாலை கோட்டத்தில், 1,800 வேம்பு, 1,800 புங்கன், 2,000 வசந்த ராணி மரக்கன்றுகள், 1,700 பாதணி, 1,700 நாவல், 1,500 நீர்மருது, 1,500 அத்தி மரக்கன்றுகள் என மொத்தம், 12,000 மரக்கன்றுகள் நடவு செய்யப்படவுள்ளது. பருவமழைக்கு முன்பாகவே அனைத்து மரக்கன்றுகளையும் நடுவதற்கு திட்டமிடப்பட்டுள்ளது.
நெடுஞ்சாலைத்துறை கோட்டப்பொறியாளர் திருகுணா, திருச்செங்கோடு ஆர்.டி.ஓ., கௌசல்யா, நகராட்சி கமிஷனர் கணேசன் ஆகியோர் கலந்து கொண்டனர்.

சிறப்பு முகாம் அறிவிப்பு
ரேஷன் அட்டையில் திருத்தம் செய்ய, சிறப்பு முகாமிற்கு மாவட்ட நிர்வாகம் ஏற்பாடு
செய்துள்ளது.
நாமக்கல் கலெக்டர் உமா வெளியிட்டுள்ள அறிக்கை: நாமக்கல் மாவட்டத்தில் பொது வினியோக திட்டத்தின் மூலம் பெயர் சேர்த்தல், பெயர் நீக்கல், பெயர் திருத்தம், புதிய குடும்ப அட்டை கோருதல், கைபேசி எண் பதிவு மற்றும் கடைகளின் செயல்பாடுகள் குறித்த புகார்களை தெரிவிப்பது உள்ளிட்ட சேவைகளை வழங்கவும், குறைகளை நிவர்த்தி செய்யும் வகையில் மக்கள் குறைதீர் நாள் முகாம் வரும், 10ல் நடக்கிறது.
காலை, 10:00 முதல் மதியம், 1:00 மணி வரை நாமக்கல், ராசிபுரம், மோகனுார், சேந்தமங்கலம், கொல்லிமலை, திருச்செங்கோடு, பரமத்தி வேலுார் மற்றும் குமாரபாளையம் டி.எஸ்.ஓ., அலுவலகங்களில் டி.எஸ்.ஓ., தலைமையில் நடைபெற உள்ளது. எனவே, பொதுமக்கள் குறைதீர் நாள் முகாமில், குறைகளை தீர்வு செய்து கொள்ள பயன்படுத்திக் கொள்ளலாம். இவ்வாறு கூறியுள்ளார்.

பள்ளம் தோண்டும் போது குடிநீர் குழாய் சேதம்
பள்ளிபாளையம் பஸ் ஸ்டாண்ட் அருகே, மேம்பாலம் பணிக்காக பொக்லைன் மூலம் பள்ளம் தோண்டும் போது, குடிநீர் குழாய் உடைந்து தண்ணீர் வீணாகி சென்றது.
பள்ளிபாளையம் பஸ் ஸ்டாண்ட் பகுதியில் மேம்பாலம் கட்டும் பணி நடந்து வருகிறது. ஒட்டமெத்தை வழித்தடத்தில், மேம்பாலத்திற்கு பில்லர் அமைக்க கடந்த சில நாட்களாக பொக்லைன் மூலம் பள்ளம் தோண்டும் பணி நடந்து வருகிறது. இதில் ஓரிடத்தில் பள்ளம் தோண்டும் போது, சாலையின் கீழே பாதிக்கப்பட்டு இருந்த பிரதான குடிநீர் குழாய் நேற்று முன்தினம் இரவு உடைந்தது.
இதனால் தண்ணீர் வீணாகி சாலையில் சென்றது. தோண்டப்பட்ட பள்ளத்திலும் தண்ணீர் குளம் போல தேங்கி இருந்தது. இதையடுத்து தண்ணீர் வினியோகம் நிறுத்தப்பட்டு, சேதமடைந்த குடிநீர் குழாய் சீரமைக்கும் பணி நடந்து வருகிறது.

எள் அறுவடை
பணி தீவிரம்
எருமப்பட்டி மற்றும் சுற்றியுள்ள பவித்திரம், செவ்வந்திப்பட்டி, உள்ளிட்ட பல்‍வேறு பகுதிகளில், விவசாயிகள் மானாவாரியாக மாசி மாதப்பட்டத்தில் எள் பயிரிட்டிருந்தனர். தற்போது அறுவடை பணிகள் நடந்து வரும் நிலையில், அறுவடை செய்யப்பட்டுள்ள எள்ளுக்கு போதிய விலை கிடைக்கவில்லை என விவசாயிகள் கவலை
யடைந்துள்ளனர்.
மேலும், 'கடந்த மாசி மாதப்பட்டத்தில் எள் பயிரிட்டோம். இந்த எள் பயிரிடப்பட்டதில் இருந்து, இதுவரை களை எடுத்தல், மருந்து தெளித்தல் உள்ளிட்ட பணிகளுக்காக, 40 ஆயிரம் ரூபாய் வரை செலவு செய்துள்ளேம். ஆனால், தற்போது ‍எள்ளுக்கு போதிய விலை இல்லை'
என்றனர்.

கோம்பு பள்ளத்தில் பொக்லைன்
மூலம் துாய்மை பணி துவக்கம்
குமாரபாளையம் பஸ் ஸ்டாண்ட் அருகே, கழிவுநீர் செல்லும் கோம்பு பள்ளம் உள்ளது. இது கத்தேரி பகுதியில் தொடங்கி, காவிரி ஆற்றங்கரையோரம் மணிமேகலை வீதி வரை செல்கிறது. சமீபத்தில் கோம்பு பள்ளத்தில் கான்கிரீட் தளம் அமைத்து சீரமைக்கப்பட்டு, பள்ளத்தின் மையப்பகுதியில் கழிவு நீர் செல்லும்படி பாதை அமைக்கப்பட்டது.
நாளடைவில் குப்பை கொட்டுவது, இறைச்சி கழிவுகளை கொட்டுவது, கட்டுமான கழிவுகள் கொட்டுவது என பலரும் செய்வதால், கழிவுநீர் செல்லும் பாதையில் அடைப்பு ஏற்பட்டு, ஆங்காங்கே குளம் போல்
கழிவுநீர் தேங்கியது.
பொதுமக்கள் துயரம் போக்க, கோம்பு பள்ளத்தை துாய்மைபடுத்தி, பள்ளத்தின் மையப்பகுதியில் கழிவுநீர் எளிதில் செல்லும்படி, அடைப்புகளை நீக்க வேண்டும், கோம்பு பள்ளத்தில் குப்பை கொட்டுவோர் மீது நடவடிக்கை எடுக்க வேண்டும் என கோரிக்கை விடுக்கப்பட்டது. இதன்படி பொக்லைன் மூலம் கோம்பு பள்ளத்தில் துாய்மைப்பணி செய்யும் பணி துவங்கியது.

 

• 1. பேரிடர் முன்னெச்சரிக்கை பாதுகாப்பு பணிகளை மேற்கொள்ள அறிவுரை
• 2. அமைச்சர் உதயநிதி வருகை: திரளாக பங்கேற்ற தர்மபுரி மாவட்ட செயலர்கள் வேண்டுகோள்
• 3. பி.எம்.சி., டெக் கல்லூரியில் பொறியாளர் தின விழா
• 4. காப்புக்காடுகளில் 4.20 லட்சம் மரக்கன்றுகள் நடும் பணி
• 5. நுண்ணீர் பாசனம், பராமரிப்பு குறித்து பயிற்சி
• 6.செய்திகள் சில வரிகளில்...
• 7. சிறுதானியங்கள், பயறு வகைகள் குறித்து விழிப்புணர்வு பிரசாரம்
• 8. புரட்டாசி சனிக்கிழமையை முன்னிட்டு பெருமாள் கோவில்களில் சிறப்பு பூஜை
• 9.பிக்கப் வாகனம் கவிழ்ந்து விபத்து: இசை கலைஞர்கள் 10 பேர் காயம்
• 10.அரசு பள்ளி விளையாட்டு மாணவி என்.ஐ.டி.,யில் சேர வாய்ப்பு