Dinamalar

• Live
•  
• Sort by:
• Latest
• Oldest
• Auto update:
• ON
• OFF

பெங்களூரு: கர்நாடகா சட்டசபை தேர்தலில் பதிவான ஓட்டுக்களை எண்ணும் பணி காலை 8 மணிக்கு துவங்கி, நடைபெற்று வருகிறது. ஓட்டு எண்ணிக்கை துவங்கியது முதல் காங்கிரஸ் முன்னிலையில் உள்ளது. காங்கிரஸ் 135, பா.ஜ., 65 இடங்களில் வெற்றி பெற்றதாக அறிவிக்கப்பட்டுள்ளது. இதனையடுத்து தனிப்பெரும்பான்மையுடன் கர்நாடகாவில் காங்., ஆட்சி அமைக்கிறது.

கர்நாடகாவில் புதிய அரசை தேர்வு செய்ய, கடந்த 10ம் தேதி மாநிலத்தின் 224 தொகுதிகளிலும், ஒரே கட்டமாக ஓட்டுப்பதிவு நடந்தது. மொத்தம் 3 கோடியே 88 லட்சத்து 51 ஆயிரத்து 807 வாக்காளர்கள் தங்கள் ஓட்டுகளை பதிவு செய்தனர். இது, 73.19 சதவீதம். பெங்களூரில் 55 சதவீதம் ஓட்டுகள் மட்டுமே பதிவாகின.

இந்நிலையில், 36 மையங்களில் அமைக்கப்பட்டுள்ள 306 அறைகளில், இன்று(மே 13) காலை 8:00 மணிக்கு ஓட்டு எண்ணிக்கை துவங்கியது. ஆட்சி அமைக்க, மொத்தம் உள்ள 224 தொகுதிகளில், 113 தொகுதிகளில் வெற்றி பெற வேண்டும் என்பது குறிப்பிடத்தக்கது. தற்போதைய நிலவரப்படி, காங்கிரஸ் பெரும்பான்மை இடங்களில் முன்னிலை வகிக்கிறது. பாஜ., பின்னடைவை சந்தித்துள்ளது.

காங்கிரஸ் முன்னிலையில் இருப்பதால், அக்கட்சி தொண்டர்கள் கொண்டாட்டத்தில் ஈடுபட்டுள்ளனர்.

‛முடிவு எதுவாக இருந்தாலும் ஏற்றுக்கொள்ள தயார். கூட்டணி குறித்து எந்த கட்சியும் எங்களை இதுவரை தொடர்ப்பு கொள்ளவில்லை. 30 முதல் 32 இடங்களில் மதச்சார்பற்ற ஜனதா தளம் வெல்லும்' என மதச்சார்பற்ற ஜனதா தளம் தலைவர் குமாரசாமி கூறியுள்ளார்.

காங்கிரஸ் கட்சி முன்னிலை வகிப்பதால், அக்கட்சியின் தொண்டர்கள் மகிழ்ச்சியை கொண்டாடி வருகின்றனர். குறிப்பாக டில்லி மற்றும் பெங்களூருவில் உள்ள காங்கிரஸ் தலைமையகங்களில் காங்கிரஸ் தொண்டர்கள் தங்களது மகிழ்ச்சியை வெளிப்படுத்தி வருகின்றனர். இதனிடையே காங்கிரஸ் முன்னிலை வகிப்பதை அடுத்து பிரியங்கா சிம்லாவில் உள்ள ஹனுமன் கோவியில் வழிபாடு செய்தார்.

பாஜ., அலுவலகத்திற்குள் புகுந்த பாம்பு

கர்நாடகா மாநிலம் ஷங்கான் தொகுதியில் பாஜ., தேர்தல் அலுவலகத்திற்குள் நாகப்பாம்பு புகுந்தது. இதனால், தேர்தல் அலுவலகத்தில் இருந்த பாஜ.,வினர் அலறியடித்து வெளியே ஓடினர். இதையடுத்து வனத்துறை அதிகாரிகள் பாஜ., அலுவலகத்தில் இருந்த பாம்பை மீட்டு சென்றனர். இதனால் அப்பகுதியில் பரபரப்பு ஏற்பட்டது.

நிருபர்கள் சந்திப்பில் கார்கே கூறுகையில், காங்கிரஸ் கட்சியின் வெற்றிக்காக உழைத்த அனைவருக்கும் நன்றி தெரிவித்து கொள்கிறேன். கர்நாடகாவில் நடைபெற்று வந்த மோசமான ஆட்சிக்கு எதிராக மக்கள் ஓட்டளித்துள்ளனர் என்றார்.

நிருபர்கள் சந்திப்பில் சித்தராமையா கூறுகையில், 2018ல் தோல்வி அடைந்த பாஜக குறுக்கு வழியில் ஆட்சியை அமைத்தது. கர்நாடகா தேர்தல் முடிவு, மக்களின் பாஜ., மீதான அதிருப்தியை வெ ளிப்படுத்தியுள்ளது. பண பலத்தால் பாஜ., வெற்றி பெற முயற்சித்தது. ஆனால் மக்கள் அதற்கு தக்க பதிலடி கொடுத்துள்ளனர்.

பிரதமர் மோடி வந்தாலும் எதுவுமே நடக்காது என்று முன்பே கூறினோம். நாங்கள் 120 இடங்களில் முன்னிலை வகிக்கிறோம். நாங்கள் எதிர்பார்த்தது போல் பெரும்பான்மையை பெறுவோம். ஊழல்வாதிகளுக்கு மக்கள் சரியான பாடம் புகட்டியுள்ளனர். பா.ஜ.,வின் ஊழல் ஆட்சியை மக்கள் வீட்டுக்கு அனுப்ப தயாராகிவிட்டனர். இவ்வாறு அவர் கூறினார்.

நிருபர்கள் சந்திப்பில் சிவகுமார் கூறுகையில், வெற்றியை கொடுத்த மக்களின் பாதம் தொட்டு வணங்குகிறேன். தேர்தலுக்கு உழைத்த சித்தராமையா மற்றும் தொண்டர்களுக்கு நன்றி என்றார். தொடர்ந்து கண்ணீர் விட்டு சிவ குமார் அழுதார்.