சுதந்திர போராட்டத்தின் போது, மகாத்மா காந்தி தங்கி ஓய்வெடுத்த பெங்களூரு, சீராமபுரம் சேவாசிரமம் பள்ளியில், 1963 வரை கல்வி கற்றேன்.

வழக்கமான பாடங்களுடன், தோட்டக்கலை, தையல் கலை, புத்தக பைண்டிங் போன்ற தொழில் பயிற்சிகளும், துப்புரவு, கழிப்பறை சுத்தப்படுத்துதல் போன்றவையும் கற்று தரப்பட்டன.

மாதந்தோறும் இலக்கிய கூட்டமும் நடந்தது. இதில், கவியரசு கண்ணதாசன், சிலம்புச் செல்வர் மா.பொ.சி., குன்றக்குடி அடிகளார் உள்ளிட்ட தமிழர் அறிஞர்கள் சொற்பொழிவு நிகழ்த்தியுள்ளனர். மாணவர்கள் பங்கேற்கும் கையெழுத்து இதழும் நடத்தப்பட்டது. அந்த இதழுக்கு ஆசிரியராக பொறுப்பேற்று செயல்பட்டேன்.

இந்த பயிற்சியால், சிறுகதைகள் எழுதினேன். ஒரு பத்திரிகையில் எழுதியதற்கு சன்மானமாக, அந்த காலத்தில், 10 ரூபாய் பெற்றேன். தொடர்ச்சியாக எழுத்துப்பணி செய்கிறேன். மூன்று புத்தகங்களை வெளியிட்டுள்ளேன்.

தற்போது, 75 வயதாகிறது. காந்தியின் காலடி பதிந்த பள்ளியில், கல்வி கற்றதுடன், சுய கவுரவத்துக்கான பயிற்சி பெற்றதையும் பெருமையாக எண்ணுகிறேன்.

- ப.மூர்த்தி, பெங்களூரு.

தொடர்புக்கு: 99721 13721