ஆடு, மாடு, கோழி, முயல், மீன், பன்றி போன்ற கால்நடைகளுக்கு செலவில்லாத அற்புத தீவனமாகவும், மனிதர்களுக்கு மிகச்சிறந்த உணவாகவும், அனைத்து உயிர்களுக்கும் உணவு கொடுத்து வாழ வைக்கும் தாயாகவும், தாவரங்களுக்கு உன்னதம் மிகுந்த உயிர் உரமாகவும் அமைந்து வளம் தரக்கூடியது 'அசோலா' என்னும் நீலப்பச்சைப்பாசி.

ஒரு மாட்டிற்கு நாள் ஒன்றுக்கு 2 கிலோ வரை கொடுக்கலாம். இதனால் 2 லிட்டர் பால் கூடுதலாக கிடைக்கும். புண்ணாக்கு, தவிடு, பருத்தி கொட்டை போன்ற தீவனங்களின் அளவை பாதியாக குறைத்து கொடுக்கலாம். மாடுகளின் சினைப்பிடிப்பு தன்மை மேம்படும். ஆடு, கோழி, மீன், முயல், பன்றி என அனைத்து கால்நடைகளுக்கும் செலவில்லாத தீவனமான பயன்படுத்தி வளம் காண்பதுடன் அதிக வருமானமும் பெறலாம்.

அசோலா வளர்க்கும் முறை: ஒரு அடி நீளமும் அகலம் குறைவான அளவில் அரை அடி உயரத்தில் மண் மூலமோ அல்லது செங்கல் மூலமோ பாத்தி அமைத்து, அதன் மீது பாலிதீன் சீட்டினை விரித்து பரப்ப வேண்டும். இப்பொழுது அரை அடி உயர தொட்டி போன்ற அமைப்பு கிடைத்து விடும். இந்த பாலிதீன் தொட்டியினுள் ஒரு அங்குலம் உயர அளவில் தோட்டத்து மண்ணை கொட்டி பரப்ப வேண்டும். 3 அங்குலம் உயரம் அளவு நீர் நிரப்ப வேண்டும். 10 கிலோ மாட்டு சாணத்தை கொட்டி நன்கு கரைத்து கலந்து விட வேண்டும். இந்த தொட்டியினுள் அரை அல்லது ஒரு கிலோ அசோலா விதைகளை துாவி கலந்து விட வேண்டும். கிரசர் பொடி (கருங்கல் பொடி) அரை கிலோ பரவலாக துாவி கலக்கி விட வேண்டும்.

தினமும் 2 கிலோ

ஒரு வாரத்தில் தொட்டி முழுவதும் அசோலா நிரம்பி வளர்ந்து விடும்.

தினமும் 2 கிலோ அசோலா அறுவடை செய்யலாம். இந்த தொட்டியினை 50 சதவீதம் நிழல் கிடைக்கும் வகையில் மர நிழலில் அமைக்க வேண்டும்.

அறுவடை செய்த அசோலாவை சுத்தமான தண்ணீரில் அலசி எடுத்து மாடுகளுக்கு 2 கிலோ வரை தவிடு, புண்ணாக்குடன் கலந்து கொடுக்கலாம்.

ஆடுகளுக்கு 300 கிராம் முதல் 500 கிராம் வரை கொடுக்கலாம். கோழிகளுக்கு தேவையான அளவு கொடுக்கலாம். மீன் வளர்க்கும் குளத்தில் அசோலாவை துாவி விடுவதன் மூலம் தேவையான அளவு உட் கொள்ளும் மீன்கள் குறைந்த காலத்தில் அதிக எடை கொண்டதாகவும், ஆரோக்கியமாகவும் வளரும்.

- ஆ.சந்தனமோகன்

சந்தன வளர்ச்சி ஆய்வு பண்ணை

பல்லடம்.

93604 35863