'இப்கோ கிசான்' எனும் நிறுவனம் (பார்மர்ஸ் பெர்டிலைசர் கோ ஆபரேடிவ் லிமிடெட்) இந்திய அரசின் கூட்டுறவு அமைப்பு. உர தயாரிப்பு, விற்பனையில் சிறப்பு வாய்ந்த நிறுவனம்.

இதன் கிளை நிறுவனம் 'இப்கோ உழவர் தொலை தொடர்பு நிறுவனம்'. இந்நிறுவனம் மூலம் இலவச குரல் வழி செய்தி, இப்கோ கிசான் அலைபேசி அப்ளிகேஷன் என இரு வகை சேவைகளை விவசாயிகளுக்கு வழங்கி வருகிறது.

இலவச குரல் வழிச் செய்தி: விவசாயிகளுக்கு தேவையான அனைத்து தகவல்களையும் கொண்டு சேர்ப்பதே இதன் நோக்கம் ஆகும். இதற்காக ஏர்டெல் நெட் ஒர்க்கை பயன்படுத்துகின்றனர். தினம் இரண்டு அல்லது மூன்று குரல் வழி செய்தியை அனுப்புகின்றனர். அவை பயிர் சாகுபடி, பயிர் பாதுகாப்பு, கால்நடை வளர்ப்பு, விவசாய பொருட்களின் சந்தை நிலவரம், வானிலை நிலவரம், மத்திய மற்றும் மாநில அரசு திட்டங்கள், கடன், மானியம், உடல் நலம், வேலை வாய்ப்பு பற்றிய முழு தகவல்களை கூறும். கேட்க தவறிய செய்திகளை மீண்டும் கேட்க 53435 எனும் எண்ணில் காலை 10:00 முதல் மாலை 6:00 மணி வரை தொடர்பு கொண்டு கேட்கலாம்.

இப்கோ கிசான் அலைபேசி அப்ளிகேசன்: விவசாய பயிர்கள் மற்றும் ஆடு மாடுகளுக்கு ஏதேனும் பாதிப்பு ஏற்பட்டால், அதை விவரித்து சொல்ல முடியாத விவசாயிகளுக்கு ஒரு புதிய தொழில்நுட்பத்தை இந்த நிறுவனம் செய்துள்ளது.

அந்த அப்ளிகேஷனில் உள்ள நிபுணர் பகுதியின் மூலம் விவசாயிகள் தங்கள் பயிர்களில் ஏதேனும் நோய் அல்லது பூச்சிகளின் பாதிப்புகள் ஏற்பட்டு இருந்தாலோ அதை தமிழ் அல்லது ஆங்கிலத்தில் டைப் செய்தும், புகைப்படமாக எடுத்தும் அனுப்பலாம். அதற்கான தீர்வை அவர்கள் அனுப்புவார்கள்.

வானிலை முன்னறிவிப்பு, மண்டி (மொத்த விற்பனை) நிலவரம், ஆலோசனை, சந்தை, வேலை வாய்ப்பு, விவசாய தகவல்கள் என பல பகுதிகள் உள்ளன. 'கிசான் பந்தரில்' ஒரு பயிர் சாகுபடியில் விதைப்பு முதல் அறுவடை வரை தெரிந்து கொள்ளலாம். சந்தை பகுதியில் உங்கள் விவசாய விளை பொருட்களை விற்கலாம், வாங்கலாம். அரசுகள், நிதி நிறுவனங்கள், பல்கலை கழக கடன் மானியம், பயிற்சி, தகவல்களை செய்தி பகுதியில் அறியலாம். தொடர்புக்கு 97917 55144.

- எம்.ஞானசேகர்

தொழில் ஆலோசகர்

சென்னை.

95662 53929