பெங்களூரு ரூரல் மாவட்டம், ஹொஸ்கோட் தாலுகாவின், சீமண்டஹள்ளி கிராமத்தில் வசிப்பவர் ஜெயஸ்ரீ, 19. இவர் பெங்களூரின் பிரபலமான தனியார் கல்லுாரியில், முதலாம் ஆண்டு பட்டப்படிப்பு படிக்கிறார்.

அவ்வப்போது ஹொஸ்கோட்டுக்கு சென்று வந்த ஜெயஸ்ரீக்கு, சிக்கபல்லாபூர் நகரின், பன்டஹள்ளி கிராமத்தை சேர்ந்த அனில்குமார், 21, என்பவருடன் அறிமுகம் ஏற்பட்டது. இன்ஸ்டாகிராம் மூலமாக நட்பு இறுக்கமானது. நாளடைவில் இது காதலாக மாறியது.

இதையறிந்த ஜெயஸ்ரீயின் பெற்றோர், மகளை கண்டித்தனர். அவருக்கு வேறு இளைஞருடன் திருமணம் செய்யவும் முயற்சித்தனர். ஆனால் ஜெயஸ்ரீ சம்மதிக்கவில்லை.

இரவோடு இரவாக, வீட்டை விட்டு ஓடி, அனில்குமாரின் வீட்டில் அடைக்கலம் புகுந்தார். இருவரும் அருகில் உள்ள கோவிலில், திருமணம் செய்து கொண்டனர்.

மகள் மாயமானது குறித்து, ஜெயஸ்ரீயின் பெற்றோர் ஹொஸ்கோட் போலீஸ் நிலையத்தில் புகார் அளித்தனர். இதற்கிடையே திருமணம் செய்து கொண்ட இளம் தம்பதி, தேன் நிலவுக்காக வெளியூர் சென்றுவிட்டு, வீட்டுக்கு திரும்பியிருந்தனர்.

தன் பெற்றோரால் தங்களின் உயிருக்கு ஆபத்து ஏற்படலாம் என்ற அச்சத்தில், தன் கணவருடன் நேற்று முன் தினம், சிக்கபல்லாபூர் எஸ்.பி., குஷல் சவுக்சேவிடம் சென்று ஜெயஸ்ரீ தஞ்சமடைந்தார்.

எஸ்.பி.,யும், இதுகுறித்து, ஹொஸ்கோட் போலீசாருக்கு தகவல் கொடுத்தார். தங்களின் மகள் சிக்கபல்லாபூர் எஸ்.பி., அலுவலகத்தில் இருப்பதை அறிந், ஜெயஸ்ரீயின் பெற்றோர், அங்கு வந்தனர். மகளை வீட்டுக்கு வரும்படி மன்றாடினர்.

'நாங்களே திருமணம் செய்து வைக்கிறோம் வா' என, மகளின் காலைப் பிடித்துக் கெஞ்சிர். ஆனால் அசராத ஜெயஸ்ரீ, 'நான் மேஜர். எனக்கு விருப்பமானவரை திருமணம் செய்து கொண்டேன். அவருடன் வாழ்வேன்' என, பிடிவாதம் பிடித்தார். பெற்றோரை ஒதுக்கிவிட்டு கணவருடன் சென்று விட்டார்.

மகளுக்கும், அவரது கணவருக்கும் எந்த தொந்தரவும் கொடுக்கக் கூடாது என, ஜெயஸ்ரீயின் பெற்றோரை எச்சரித்து அனுப்பினர்.