சாம்ராஜ்நகரின் மாவட்ட மருத்துவமனை, மாணவர் விடுதிகளை உபலோக் ஆயுக்தா நீதிபதி பனீந்திரா நேற்று முன் தினம் ஆய்வு செய்தார்.

கர்நாடக மாநில உபலோக் ஆயுக்தா நீதிபதி பனீந்திரா, அவ்வப்போது அரசு மருத்துவமனைகள், மாணவ - மாணவியர் விடுதிகள் என பல இடங்களில் திடீர் ஆய்வு செய்து, அதிகாரிகளுக்கு உத்தரவு பிறப்பிப்பார்.

சாம்ராஜ் நகரில் நேற்று முன்தினம் இரவில் நகரை வலம் வரத் துவங்கினார். மாவட்ட அரசு மருத்துவமனைக்கு சென்றவுடன், அங்கிருந்த நோயாளிகளும் அவர்களின் உறவினர்களும் படுக்கைகள், தண்ணீர், குளியல் அறைகளில் உள்ள குளறுபடிகள் குறித்து புகார் செய்தனர்.

நோயாளிகள் கூறியதை ஆய்வு செய்த நீதிபதி பனீந்திராவும் அதிர்ச்சி அடைந்தார். மருத்துவமனை அதிகாரிகளை பார்த்து, 'இங்குள்ள படுக்கைகள், பிற பொருட்கள், இந்த மருத்துவமனை திறக்கப்பட்டபோது நிறுவப்பட்டதா?' என, அதிருப்தி தெரிவித்தார்.

அங்கிருந்து சாம்ராஜ் நகரின் பல்வேறு மாணவர், மாணவியர் விடுதிகளை ஆய்வு செய்தார். ஏ.பி.எம்.சி., சாலையில் உள்ள டி.தேவராஜ் அர்ஸ் பின்தங்கிய வகுப்பு மாணவியர் விடுதிக்கு சென்றார்.

அப்போது மாணவியர், 'இங்குள்ள அனைத்து தளங்களிலும் குடிநீர் வடிகட்டிகள் பொருத்த வேண்டும். குளியல் அறையில் தண்ணீர் இல்லை. மின் விசிறிகள் வேலை செய்யவில்லை. இங்கு சப்பாத்தி, மிஷினில் செய்யப்படுவதால், தடினமாக இருக்கிறது. இதை சாப்பிடுவதால் சிலருக்கு வயிற்றுவலி ஏற்படுகிறது. சாதம் சரியாக வேக வைப்பதில்லை' என்றனர்.

அதற்கு நீதிபதி பவீந்திரா, 'உங்கள் குறைகளை சரி செய்ய நடவடிக்கை எடுக்கிறேன். சமுதாயத்திற்கு நல்ல குடிமக்களாக இருங்கள். வருங்காலத்தில் எந்த துறையில் நீங்கள் சேர்ந்தாலும், அதில் ஊழல் செய்யாமல் நேர்மையாக வாழுங்கள். பாடப் புத்தகங்களை தவிர, வாழ்க்கைக்கு தேவையான மற்ற புத்தகங்களையும் படியுங்கள். விடுதியை சுத்தமாக வைத்திருங்கள்' என, அறிவுரை வழங்கினார்.

பின், அவர் அளித்த பேட்டி:

மாணவர்களின் வளர்ச்சிக்காக விடுதிகளுக்கு செல்கிறேன். மூன்று ஆண்டுகளுக்கு முன் இதே விடுதிக்கு வந்து, மூன்று நாட்கள் தங்கியிருந்தேன். அப்போது பல பிரச்னைகள் இருந்தன. அப்போது இருந்த பிரச்னைகளை தீர்க்க, இரண்டு மாத அவகாசம் அளித்திருந்தேன். அந்த பிரச்னைகள், இப்போது நிவர்த்தி செய்யப்பட்டுள்ளது மகிழ்ச்சி அளிக்கிறது.

மாணவர்கள் கூறிய விஷயங்கள் குறித்து நடவடிக்கை எடுக்க அதிகாரிகளுக்கு உத்தரவிட்டுள்ளேன். இங்கு நுாலகமும், கணினி மையமும் அமைக்க உத்தரவிட்டுள்ளேன். அரசின் விதிகளின்படி நிதி ஒதுக்கப்படும். நிதி போதவில்லை என்றால், என்னிடம் தெரிவிக்க கூறி உள்ளேன். கமிஷனரிடம் பேசி, கூடுதல் நிதி ஒதுக்க அறிவுறுத்துவேன்.

ஆரம்பத்தில் இங்கு சானிடரி பேட் வழங்கப்பட்டு வந்தது. இப்போது ஏன் வழங்கவில்லை என்று தெரியவில்லை. இது குறித்து மாவட்ட கலெக்டர் ஷில்பா நாக்கிடம் கூறியுள்ளேன். அரசின் கவனத்துக்கு கொண்டு செல்வதாக அவரும் கூறி உள்ளார்.

இவ்வாறு அவர் கூறினார்.