சிக்கமகளூரு மாவட்டம், சிருங்கேரி தாலுகாவில் வசிப்பவர் சங்கர் நடராஜன், 72. இவரது 'வாட்ஸாப்' எண்ணுக்கு, ஒரு விளம்பரம் வந்தது. அதில், 'இந்தியன் ஸ்டாக் ரிலையன்ஸ் செக்யூரிடீஸ்' நிறுவனத்தில் முதலீடு செய்தா ல், அதிகமான லாபம் கிடைக்கும்' என கூறப்பட்டிருந்தது. இதை நம்பிய சங்கர் நடராஜன், குறிப்பிட்ட தொகையை முதலீடு செய்தார்.

சில நாட்களுக்கு பின், அவரை தொடர்பு கொண்ட ஒருவர், 'நீங்கள் செய்த முதலீடுக்கு, லாபம் வந்துள்ளது. தற்போது உங்கள் கணக்கில் ஒன்பது கோடி ரூபாய் உள்ளது. அதை நீங்கள் எடுக்க வேண்டுமானால், 1.9 கோடி ரூபாய் கமிஷன் கொடுக்க வேண்டும்' என்றார்.

பல காரணங்களை கூறியதால், சங்கர் நடராஜன், கொஞ்சம் கொஞ்சமாக 3.27 கோடி ரூபாயை பரிமாற்றம் செய்தார். ஆனால் லாபத்தை எடுக்க முடியவில்லை. அந்நபர்களும் தொடர்பை துண்டித்துக் கொண்டனர்.

எனவே சந்தேகமடைந்த சங்கர் நடராஜன், மஹாராஷ்டிராவின், இந்தியன் ஸ்டாக் ரிலயன்ஸ் செக்யூரிட்டீஸ் நிறுவனத்தின், மத்திய அலுவலகத்துக்கு சென்று விசாரித்தார். அப்போது தான், மோசடி நடந்திருப்பது தெரிந்தது.

இதுகுறித்து, சிக்கமகளூரின் சைபர் குற்றப்பிரிவு போலீஸ் நிலையத்தில், நேற்று முன் தினம் புகார் அளித்தார். போலீசாரும் வழக்குப் பதிவு செய்து விசாரணையை துவக்கியுள்ளனர்.