இதுகுறித்து, அம்மருத்துவமனை நிர்வாக அதிகாரிகள் கூறியதாவது:

புற்றுநோயால் பாதிக்கப்பட்ட பலருக்கு, மருத்துவமனைகளுக்கு வர முடிவதில்லை. இத்தகைய நோயாளிகளுக்கு, அவர்களின் வீட்டுக்கே சென்று சிகிச்சையளிக்க, கித்வாய் மருத்துவமனை முடிவு செய்துள்ளது. நிபுணர்கள் அடங்கிய குழுவினர், நோயாளிகளின் வீட்டுக்கு சென்று சிகிச்சை அளிப்பர்.

நோயாளிகள் விரைவில் குணமடைய, இத்திட்டம் உதவியாக இருக்கும். படுத்த படுக்கையாக உள்ளவர்களை, மருத்துவமனைக்கு அழைத்து வருவதை தவிர்க்கலாம். கித்வாய் மருத்துவமனையிலும் நெருக்கடி குறையும்.

புற்றுநோய்க்கு சிகிச்சை பெறவும், சந்தேகத்தின் பேரில் பரிசோதனை செய்து கொள்ளவும் வரும் நோயாளிகளின் எண்ணிக்கை, நாளுக்கு நாள் அதிகரிக்கிறது. மருத்துவமனையில் சேர்த்து, சிகிச்சையை துவங்குவதற்குள் நோய் தீவிரமடையும் அபாயம் உள்ளது.

வீட்டுக்கு சென்று சிகிச்சை அளித்தால், மருத்துவமனையில் நோயாளிகள் சேர்வது குறையும். படுக்கை பற்றாக்குறைக்கு தீர்வு கிடைக்கும்.

நோயாளிகளின் வீடுகளுக்கு சென்று, சிகிச்சையளிக்க அதிநவீன வேன் பயன்படுத்தப்படும். இந்த வேனில் சிறப்பு டாக்டர் ஒருவர், நர்ஸ், மருத்துவ ஊழியர் இருப்பர். இந்த குழுவினர், நோயாளி மற்றும் அவரது குடும்பத்துடன் ஆலோசித்து, தேவையான சிகிச்சை அளிப்பர்.

வீட்டுச்சூழலில் சிகிச்சை அளிப்பதால், நோயாளிக்கு பயம், வலி குறையும். சிகிச்சைக்கு குடும்பத்தினரும் உதவுவர் என்பதால், நோயாளிக்கு விரைவில் குணமாகும் என்ற நம்பிக்கை ஏற்படும். பாதுகாப்பு உணர்வு ஏற்படும். மருத்துவமனைக்கு அலைந்து, நோயாளியின் உடல் பலவீனமாவதை தவிர்க்கலாம்.

முதற்கட்டமாக, கித்வாய் மருத்துவமனையில் இருந்து, 15 கி.மீ., சுற்றளவில் உள்ள நோயாளிகளுக்கு இத்திட்டம் செயல்படுத்தப்படும். அதன்பின் இந்த சேவை விஸ்தரிக்கப்படும். வீடுகளுக்கு சென்று சிகிச்சை அளிப்பதுடன், தேவையான மருந்துகளும் வழங்கப்படும்.

இவ்வாறு அவர்கள் கூறினர்.