பஞ்சாபில் முதல்வர் பகவந்த் சிங் மான் தலைமையில் ஆம் ஆத்மி ஆட்சி நடக்கிறது. இங்கு போக்குவரத்து துறையை தனியார்மயமாக்கும் நடவடிக்கையை அரசு மேற்கொண்டுள்ளது. இதனால், போக்குவரத்து துறையில் பணியாற்றும் ஒப்பந்த பணியாளர்களின் நிலை கேள்விக்குறியாகி உள்ளது.

இந்நிலையில் பஞ்சாப் அரசின் நடவடிக்கையைக் கண்டித்து போக்குவரத்து ஒப்பந்த பணியாளர்கள், பணி நிரந்தரம், ஊதிய உயர்வு உள்ளிட்ட பல்வேறு கோரிக்கைகளை வலியுறுத்தி சங்ரூர் பகுதியில் நேற்று முன்தினம் போராட்டத்தில் ஈடுபட்டனர்.

அப்போது போராட்டத்தை கைவிட்டு கலைந்து செல்லும்படி போலீசார் அறிவுறுத்தினர். இதனால் போராட்டக்காரர்களுக்கும், போலீசாருக்கும் இடையே தள்ளு முள்ளு ஏற்பட்டது.

பாதுகாப்பு பணியில் இருந்த போலீஸ் இன்ஸ்பெக்டர் ஜஸ்வீர் சிங், போக்குவரத்து துறை ஒப்பந்த பணியாளர்களை சமாதானப்படுத்த முயன்றார்.

போராட்டத்தில் ஈடுபட்ட சிலர், திடீரென மறைத்து வைத்திருந்த பெட்ரோல் பாட்டிலை எடுத்து இன்ஸ்பெக்டர் ஜஸ்வீர் சிங் மீது ஊற்றி, தீவைத்தனர். காக்கி சீருடையில் தீப்பிடித்து மளமளவென எரிந்ததில், அவர் அலறி துடித்தார்.

அதிர்ச்சியடைந்த சக போலீசார், உடனடியாக தீயை அணைத்து, ஜஸ்வீர் சிங்கை மருத்துவமனையில் சேர்த்தனர். உடல் முழுதும் தீக்காயங்கள் ஏற்பட்டிருப்பதால், அவருக்கு டாக்டர்கள் தீவிர சிகிச்சை அளித்து வருகின்றனர்.

இந்த சம்பவம் தொடர்பாக ௧௦ பேர் மீது வழக்கு பதிந்து போலீசார் தேடி வருகின்றனர்.