கர்நாடக காங்கிரஸ் ஆட்சியில் முதல்வர் பதவியை தக்கவைப்பதில் முதல்வர் சித்தராமையா மும்முரமாக உள்ளார். இந்த ஆட்சி முடியும் வரை தானே முதல்வராக இருப்பேன் என்றும் சொல்லி வருகிறார். ஆனால், ஆட்சி அமைய தன் உழைப்பு மிக பெரியது, ஆட்சி அமையும்போது போடப்பட்ட வாய்மொழி ஒப்பந்தப்படி, தனக்கு முதல்வர் பதவியை விட்டுத் தர வேண்டும் என்று துணை முதல்வர் சிவகுமார் வலியுறுத்தி வருகிறார்.

தங்கள் கருத்தில் இருவரும் அடம் பிடித்து வருவது, கர்நாடக காங்கிரஸ் ஆட்சியில் குழப்பத்தை ஏற்படுத்தியுள்ளது. இரண்டு தலைவர்களின் ஆதரவாளர்களும் சமூக வலைதளங்களில் வாக்குவாதத்தில் ஈடுபடுகின்றனர். கடந்த ஒரு மாதமாக அரசு இயந்திரம் முடங்கிக் கிடப்பதாக பொது மக்கள் எரிச்சல் அடைந்துள்ளனர்.

எந்த விதமான மேம்பாட்டுப் பணிகளும் நடக்கவில்லை என்று எதிர்க்கட்சியினர் குற்றஞ்சாட்டுகின்றனர். இதற்கிடையில், முதல்வராக சித்தராமையா தொடரவில்லை என்றால், காங்கிரசுக்கு எதிராக செயல்படுவோம் என்று அவர் சார்ந்த குரும்பர் சமுதாயத்தினர் ஆலோசனை நடத்தி தீர்மானித்தனர். மூத்த தலைவர்களே சண்டை போடுவது ஆட்சிக்கும், கட்சிக்கும் மட்டுமின்றி தொண்டர்களும் வேதனையில் உள்ளனர்.

இந்நிலையில் இன்று (நவ.,29) காங்கிரஸ் மேலிடத்தின் உத்தரவுப்படி, கர்நாடக முதல்வர் சித்தராமையா அளித்த காலை உணவு விருந்தில் துணை முதல்வர் சிவக்குமார் பங்கேற்றார். இருவரும் பேசிக்கொண்ட விவரம் இன்னும் வெளியாகவில்லை. இது பற்றி காங்கிரஸ் மேலிடம் இறுதி முடிவை அறிவிக்கும் என்று எதிர்பார்க்கப்படுகிறது.

முதல்வர், துணை முதல்வர் இடையே மோதல் போக்கு நீடித்தால், டிசம்பர் 8ம் தேதி துவங்கும் குளிர்கால சட்டசபை கூட்டத்தொடரில், அமளியில் ஈடுபட்டு போராட்டம் நடத்த எதிர்க்கட்சியினர் திட்டமிட்டு இருக்கின்றனர்.