மஹாராஷ்டிராவில் முதல்வர் தேவேந்திர பட்னவிஸ் தலைமையில் பா.ஜ., - சிவசேனா - தேசியவாத காங்., அடங்கிய, 'மஹாயுதி' கூட்டணி ஆட்சி நடக்கிறது. சிவசேனா தலைவர் ஏக்நாத் ஷிண்டே, தேசியவாத காங்., தலைவர் அஜித் பவார் ஆகியோர், துணை முதல்வர்களாக உள்ளனர்.

இங்கு, 246 நகராட்சிகள், 42 நகர பஞ்சாயத்துகளுக்கு டிச., 2ல் உள்ளாட்சி தேர்தல் நடக்கிறது; 3ல் ஓட்டு எண்ணிக்கை நடக்கிறது. பத்லாபூர் நகராட்சியில் மொத்தம் 49 இடங்கள் உள்ளன.

அப்பகுதியைச் சேர்ந்த சிவசேனா நகரப்பிரிவு தலைவர் வாமன் மாத்ரே, செல்வாக்குமிக்க அரசியல்வாதி. அவர், அவரது மனைவி, மகன், சகோதரர் என ஆறு பேருக்கு, நகராட்சி தேர்தலில் போட்டியிட சிவசேனா சீட் வழங்கி உள்ளது.

கடந்த 2015 உள்ளாட்சித் தேர்தலில் வாமன் மாத்ரே குடும்பத்தைச் சேர்ந்த நான்கு பேருக்கு சீட் வழங்கப்பட்ட நிலையில், தற்போது ஆறு பேருக்கு வாய்ப்பு வழங்கப்பட்டுள்ளது. பத்லாபூரில் மாத்ரே குடும்பத்தினர் ஆதிக்கம் செலுத்துவது, அரசியலில் பேசுபொருளாகி உள்ளது.

இதை வெளிப்படையாக விமர்சித்துள்ள பா.ஜ., 'ஏக்நாத் ஷிண்டே தலைமையிலான சிவசேனா வாரிசு அரசியலை ஊக்குவிக்கிறது. இது, திறமையான களப்பணியாளர்கள் இல்லாததை காட்டுகிறது' என தெரிவித்துள்ளது.