மேற்கு வங்கத்தில் முதல்வர் மம்தா பானர்ஜி தலைமையில் திரிணமுல் காங்., ஆட்சி நடக்கிறது.

இங்கு, அடுத்தாண்டு ஏப்ரல் - மே மாதங்களில் சட்டசபை தேர்தல் நடக்க உள்ள நிலையில், எஸ்.ஐ.ஆர்., எனப்படும் வாக்காளர் பட்டியல் சிறப்பு தீவிர திருத்தப் பணி நடக்கிறது. இதற்கு, முதல்வர் மம்தா பானர்ஜி எதிர்ப்பு தெரிவித்து வருகிறார்.

கோரிக்கை இந்த சூழலில், எஸ்.ஐ.ஆர்., பணியில் ஈடுபட்டிருந்த ஓட்டுச்சாவடி நிலை அதிகாரிகள், பணிச்சுமை தாங்காமல் தற்கொலை செய்து கொண்டதாக குற்றச்சாட்டு எழுந்தது.

இந்த விவகாரத்தில் தேர்தல் கமிஷன் தலையிட வேண்டும் என, முதல்வர் மம்தா பானர்ஜி சமீபத்தில் கோரிக்கை விடுத்திருந்தார்.

இதையடுத்து ஓட்டுச்சாவடி நிலை அதிகாரிகள் உயிரிழப்புக்கான காரணம் குறித்து கண்டறியும்படி, மாநில தலைமை தேர்தல் அதிகாரிக்கு தேர்தல் கமிஷன் அறிவுறுத்தியது.

மேலும் திரிணமுல் காங்., பிரதிநிதிகளுடன் சிறப்பு கூட்டம் நடத்தவும் தேர்தல் கமிஷன் ஒப்புக் கொண்டது.

அதன்படி கொல்கட்டாவில் நேற்று நடந்த சிறப்பு கூட்டத்தில், திரிணமுல் காங்., பிரதிநிதிகள் முன்வைத்த குற்றச்சாட்டுகளுக்கு, புள்ளி விபரங்களுடன் தேர்தல் கமிஷன் பதில் அளித்தது.

மேலும், ஓட்டுச்சாவடி நிலை அலுவலர்களை, திரிணமுல் காங்., கட்சியினர் மிரட்டவோ, அரசியல் ரீதியாக அழுத்தம் தரவோ கூடாது எனவும் எச்சரிக்கை விடுத்தது.

இது தொடர்பாக தேர்தல் கமிஷன் பிறப்பித்த உத்தரவு:

ஓட்டுச்சாவடி நிலை அதிகாரிகளின் கடமைகளில் குறுக்கிடக் கூடாது. குறிப்பாக உயிரிழந்தவர்கள், புலம்பெயர்ந்தவர்கள், போலி வாக்காளர்களின் பெயர்களை பட்டியலில் இருந்து நீக்கும்போது, அதில் தலையிடக் கூடாது.

வரைவு வாக்காளர் பட்டியல் வெளியிடப்பட்ட பின், அதாவது டிச., 9க்கு பிறகே வாக்காளர் பட்டியல் தயாரிப்பு தொடர்பான ஆட்சேபனைகளை தெரிவிக்க வேண்டும். அதற்கு முன்பாக, ஓட்டுச் சாவடி நிலை அலுவலர்களின் கடமையில் குறுக்கிடக் கூடாது.

பாதுகாப்பு ஓட்டுச்சாவடி நிலை அலுவலர்கள், தேர்தல் பதிவு அதிகாரிகள், மாவட்ட தேர்தல் அதிகாரிகள் அனைவருமே மாநில அரசின் ஊழியர்கள் தான். அவர்களை சுதந்திரமாக பணி செய்ய அனுமதிக்க வேண்டும்.

அரசியல் ரீதியான அழுத்தமோ, மிரட்டலோ அவர்களுக்கு தரக் கூடாது. மாநிலத்தில் உள்ள தலைமை தேர்தல் அலுவலகத்தின் பாதுகாப்பு கவலைக்கிடமாக உள்ளது.

எனவே, தேர்தல் அலுவலகத்தை வேறு பாதுகாப்பான இடத்திற்கு மாற்ற வேண்டும். புதிய அலுவலகத்திற்கும் உரிய பாதுகாப்பு வழங்குவதை மாநில டி.ஜி.பி., உறுதி செய்ய வேண்டும்.

இவ்வாறு அதில் கூறப்பட்டுள்ளது.