கேரளாவின் பாலக்காடு சட்டசபை தொகுதிக்கு கடந்த ஆண்டு நவம்பரில் நடந்த இடைத்தேர்தலில், காங்கிரசைச் சேர்ந்த ராகுல் மாம்கூட்டதில் வெற்றி பெற்றார்.

இவர் மீது, மலையாள நடிகை ரினி ஆன் ஜார்ஜ் உள்ளிட்ட பலர் பாலியல் குற்றச்சாட்டுகளை சுமத்தினர்.

இதையடுத்து, கேரள இளைஞர் காங்கிரஸ் தலைவர் பதவியில் இருந்து விலகினார். இதைத்தொடர்ந்து காங்., தலைமை, கட்சியிலிருந்து சமீபத்தில் அவரை இடைநீக்கம் செய்தது.

இந்நிலையில், ராகுல் மாம்கூட்டதில் மீது மற்றொரு பெண் பாலியல் புகார் அளித்துள்ளார். கடந்த சில நாட்களாக இதுதொடர்பாக ஆடியோ மற்றும் 'வாட்ஸாப்' பதிவுகள் சமூக வலைதளங்களில் வேகமாக பரவின.

இதற்கிடையே, திருவனந்தபுரத்தில் உள்ள தலைமை செயலகத்தில் நேற்று முன்தினம் நடந்த குறைதீர் கூட்டத்தில், முதல்வர் பினராயி விஜயனை சந்தித்து அப்பெண் புகார் அளித்தார். அப்போது, எம்.எல்.ஏ., ராகுல் தன்னை பாலியல் பலாத்காரம் செய்ததுடன், தன் வயிற்றில் வளரும் கருவை கலைக்கும்படி கட்டாயப்படுத்தியதாக குற்றஞ்சாட்டினார்.

இதுதொடர்பான, 'வாட்ஸாப்' பதிவுகள் மற்றும் ஆடியோ ஆதாரங்களையும் சமர்ப்பித்தார். இதையடுத்து, அவரிடம் வாக்குமூலம் பெற்ற போலீசார், அவரை மருத்துவ பரிசோதனைக்கு அனுப்பினர்.

இதைத்தொடர்ந்து, எம்.எல்.ஏ.,ராகுல் மீது பல்வேறு பிரிவுகளின் கீழ் போலீசார் வழக்குப்பதிவு செய்து விசாரணை நடத்தி வரும் நிலையில், அவர் தன் கூட்டாளிகளுடன் தலைமறைவானதாக கூறப்படுகிறது.