'நிலத்துக்கான நீதி வேண்டும்' என்ற தலைப்பிலான மாநாடு டில்லியில் நடந்தது. நாடு முழுதும் உள்ள பெண் அறிஞர்கள், எழுத்தாளர்கள், சமூக செயற்பாட்டாளர்கள் உள்ளிட்டோர் அடங்கிய, அகில இந்திய அறிவுசார் மகளிர் மன்றம் இந்த மாநாட்டுக்கு ஏற்பாடு செய்திருந்தது.

இதில், நாடு முழுதும் இருந்து ஏராளமான மகளிர் அமைப்பினர், சமூக ஆர்வலர்கள் பங்கேற்றனர்.

தவறாக கையகப்படுத்தப்பட்ட நிலங்கள், பயனற்ற வகையில் வீணாவது குறித்து மாநாட்டில் விவாதிக்கப்பட்டது. தமிழகத்தை சேர்ந்த முன்னாள் ஐ.ஏ.எஸ்., அதிகாரியும், தலித் - பெண்ணிய எழுத்தாளரும், சமூக ஆர்வலருமான சிவகாமி இந்த மாநாட்டில் பங்கேற்று பல்வேறு கருத்துகளை முன்வைத்தார்.

நடவடிக்கை

அவர் கூறியதாவது:

பல மாநிலங்களில், சாகுபடி செய்யக்கூடிய நிலத்தின் ஒரு பகுதி, மத அறக்கட்டளைகளின் கீழ், குறிப்பாக கோவில் நிலங்களின் கீழ் உள்ளது. வரலாற்று விதிகளின்படி, இந்த நிலங்கள் மக்கள் நலனுக்காக பயன்படுத்தப்பட வேண்டியவை.

ஆனால், பல இடங்களில் இந்த நிலங்கள் குத்தகைக்கு விடப்பட்டுள்ளன. நிலமற்ற பட்டியல் இனத்தைச் சேர்ந்தவர்கள், புறக்கணிக்கப்பட்ட விவசாயிகள் இந்த நிலங்களில் வேலை செய்து வருகின்றனர்.

அவர்களுக்கு எந்தவித சட்டப் பாதுகாப்போ, உரிமை ஆவணமோ இல்லை. இவ்வாறு புறக்கணிக்கப்பட்டுள்ள மக்களுக்கு நிலம் கிடைக்க வேண்டும். அவர்களுக்கு மரியாதையும், வாழ்வாதாரமும் கிடைக்க வேண்டும்.

எனவே, நிலத்தை அடிப்படை வாழ்வாதாரமாக அங்கீகரிக்க, மத்திய அரசு சட்டம் கொண்டு வர வேண்டும். கையகப்படுத்தப்பட்ட நிலங்களை மீட்டு, விளிம்புநிலை மக்களுக்கு சமமாக பிரித்தளிக்க நடவடிக்கை எடுக்க வேண்டும்.

நம் நாட்டில், வாழ்வாதாரம், மரியாதை, அடையாளம் ஆகியவை நில உரிமைக்கு மிகவும் முக்கியமானதாக உள்ளது.

பொது நிலங்களையும், காடுகளையும் அரசு அல்லது தனியார் துறை கைப்பற்றும் போது, பட்டியல் இனத்தவர், பழங்குடியினர் மற்றும் காடு வாழ் மக்கள் பெரிதும் பாதிக்கப்படுகின்றனர்.

நாட்டில் உள்ள, 26.8 லட்சம் ஹெக்டேர் வன நிலங்கள், அரசு தலைமையிலான நில வங்கிகளுக்கு மாற்றப்பட்டுள்ளன. மறுபுறம், 50 - 60 சதவீத மக்கள் நிலமற்றவர்களாக உள்ளனர். இதனால், அவர்களுக்கான சமூக உரிமை பறிக்கப்படுகிறது. இவ்வாறு அவர் கூறினார்.

வலியுறுத்தல் மாநாட்டில் பங்கேற்ற தலித் மற்றும் ஆதிவாசி அமைப்புகளின் தேசிய கூட்டமைப்பின் தலைவர் அசோக் பாரதி, தெற்காசியாவில் பாலினம் மற்றும் நில உரிமைகள் குறித்த புரட்சிகரமான பணிகளைச் செய்த புகழ்பெற்ற பொருளாதார நிபுணர் பினா அகர்வால் உள்ளிட்டோர் இதே கருத்தை வலியுறுத்தினர்.

'நிலம் என்பது ஒரே நபரின் சொத்தாக மட்டும் கருதப்படக்கூடாது; குழுவாக சொந்தம் கொண்டாடும் முறை குறித்து சிந்திக்க வேண்டும்' என்றும் மாநாட்டில் வலியுறுத்தப்பட்டது.

- நமது சிறப்பு நிருபர் - '