ரயில் பயணங்களில் உரிய பாதுகாப்பை வழங்க வழிகாட்டு நெறிமுறைகளை உருவாக்கக் கோரி தொடரப்பட்ட மனுக்கள், உச்ச நீதிமன்ற நீதிபதிகள் அஹ்சானுதீன் அமானுல்லா, கே.வினோத் சந்திரன் ஆகியோர் அடங்கிய அமர்வு முன் நேற்று விசாரணைக்கு வந்தன.

அப்போது, ரயில் விபத்து களின் போது பயணியருக்கு கிடைக்கும் காப்பீட்டில் நிறைய குழப்பங்கள் இருப்பதாக, நீதிமன்றத்துக்கு உதவ நியமிக்கப்பட்ட மூத்த வழக்கறிஞர் ஷிகில் சூரி, அறிக்கையில் சுட்டிக்காட்டி இருந்தார்.

இதன்பின், நீதிபதிகள் பிறப்பித்த உத்தரவு:

ஆன்லைனில் ரயில் டிக்கெட் வாங்கும் பயணியருக்கு விபத்து காப்பீடு வழங்கப்படுகிறது. அதே சமயம், கவுன்டரில் வாங்குவோருக்கு விபத்து காப்பீடு மறுக்கப்படுகிறது. இந்த இரு நடைமுறைகளுக்கு இடையே உள்ள வேறுபாட்டுக்கான காரணம் என்ன?

இது குறித்து, ரயில்வே துறை விளக்கம் அளிக்க வேண்டும். மேலும், தண்டவாளங்கள் மற்றும் ரயில்வே கிராசிங் பகுதிகளில் பாதுகாப்புக்கு முக்கியத்துவம் அளிக்க ரயில்வே நிர்வாகம் நடவடிக்கை எடுக்க வேண்டும். இவ்வாறு உத்தரவிட்ட நீதிபதிகள், வழக்கை ஜன., 13க்கு தேதிக்கு ஒத்தி வைத்தனர்.