பீஹார் சட்டசபை தேர்தலில் ரகோபூர் தொகுதியில் ஆர்ஜேடி தலைவர் தேஜஸ்வி போட்டியிட்டார். 2015 முதல் இந்தத் தொகுதியில் அவர் எம்எல்ஏ ஆக இருந்து வருகிறார். அதற்கு முன்பு இந்தத் தொகுதியில் இருந்து அவரது தந்தை லாலு மற்றும் தாயார் ராப்ரி ஆகியோர் வெற்றி பெற்றுள்ளனர். கடந்த தேர்தலில் தேஜஸ்வி 38 ஆயிரம் ஓட்டு வித்தியாசத்தில் வெற்றி பெற்று இருந்தார். இதனால், இந்த முறை அவர் எளிதாக வெற்றி பெறுவார் என ஆர்ஜேடி தொண்டர்கள் எதிர்பார்த்தனர்.

இந்த முறை பாஜ சதிஸ்குமார் யாதவ் என்பவரை களமிறக்கியது. இவர் 2010 தேர்தலில்,இந்த தொகுதியில் ராப்ரி தேவியை தோற்கடித்தவர் ஆவார். ஜன்சுராஜ் கட்சியும் களமிறங்கியது. இது போதாது என்று, தேஜஸ்வியின் சகோதரர் தேஜ் பிரதாப்பும் ஜன்சக்தி ஜனதா தளம் என்ற கட்சியை துவக்கி இந்தத் தொகுதியில் சகோதரருக்கு எதிராக வேட்பாளரை களமிறக்கினார்.

துவக்கம் முதல் இந்தத் தொகுதியில் தேஜஸ்வி பின்னடைவை சந்தித்து வந்தார். பிறகு கடைசி சில சுற்றுகளில் கூடுதல் ஓட்டுக்கள் பெற்ற தேஜஸ்வி 14,532 ஓட்டுகள் வித்தியாசத்தில் வெற்றி பெற்றார். இந்தத் தேர்தலில் ஆர்ஜேடி கட்சிக்கு பின்னடைவு ஏற்பட்ட நிலையில், அக்கட்சியின் முதல்வர் வேட்பாளராக அறிவிக்கப்பட்ட தேஜஸ்வி வெற்றி பெற்றுள்ளது அக்கட்சி தொண்டர்களுக்கு மகிழ்ச்சியை ஏற்படுத்தியுள்ளது.