பா.ம.க., கவுரவ தலைவரும், ராமதாஸ் தரப்பு எம்.எல்.ஏ.,வுமான மணி நேற்று டில்லியில் அளித்த பேட்டி:

பா.ம.க.,வில் மூன்று ஆண்டுகளுக்கு ஒரு முறை உட்கட்சி தேர்தல் நடைபெறும். அதன்டி, கடந்த 2022ல் தலைவராக தேர்வான அன்புமணியின் பதவிக்காலம் முடிவடைந்து விட்டது. எனவே, கட்சி பொதுக்குழு வாயிலாக, கடந்த மே மாதம் கட்சியின் நிறுவனரான ராமதாஸ், தலைவராக தேர்ந்தெடுக்கப்பட்டார்.

உண்மை நிலை இப்படி இருக்க, 2023ல் தலைவராக தேர்ந்தெடுக்கப்பட்டதாகவும், பதவிக்காலம் 2026 ஆகஸ்ட் வரை இருப்பதாகவும், போலியான ஆவணத்தை அன்புமணி தந்துள்ளார்.

உண்மைக்கு மாறான அதை ஏற்று, அன்புமணியை தலைவராக தேர்தல் கமிஷன் அங்கீகரித்தது ஜனநாயக படுகொலை.

எங்கள் தரப்பு கடிதங்களை எல்லாம் ஏற்பதாக கூறும் தலைமை தேர்தல் கமிஷன், எங்களுக்கு நியாயம் வேண்டுமானால், எங்களிடம் உள்ள ஆவணங்களை கொண்டு, நீதிமன்றம் செல்லுமாறு கடிதம் அளித்துள்ளது. இது ஏற்கத்தக்கது அல்ல.

கடந்த ஐந்து மாதங்களாக நடையாய் நடந்து, உண்மையான ஆவணங்களை அளித்து, எங்கள் தரப்பு நியாயத்தை முறையிட்டும், இப்படி ஒரு மோசடியான உத்தரவை வெளியிடுவது, கட்சியை திருடும் செயலாக பார்க்கிறோம்.

அன்புமணி மோசடிக்கு, தேர்தல் கமிஷன் துணை போவதை, ஜனநாயக படுகொலையாக பார்க்கிறோம். இப்படியெல்லாம் செய்தால், தேர்தல் கமிஷன் மீது எப்படி நம்பிக்கை வரும். இதை கண்டித்து, தலைமை தேர்தல் கமிஷன் முன், பா.ம.க., சார்பில் போராட்டம் நடத்தப்படும்.

இந்த விவகாரத்தில் அன்புமணிக்கு ஆதரவாகவும், ராமதாசுக்கு எதிராகவும் ஏதோ ஒரு மோசடி நடந்துள்ளது. இந்த விஷயத்தில், பா.ஜ., தரப்பிலிருந்து அன்புமணிக்கு ஆதரவாக அழுத்தம் இருக்கும் என நாங்கள் கருதவில்லை. இவ்வாறு அவர் கூறினார்.

- நமது டில்லி நிருபர் -