புதுச்சேரி, குயவர்பாளையம், திருமால் நகரை சேர்ந்தவர் செல்வராஜ் மனைவி ரங்கநாயகி,78; காசி யாத்திரை செல்வதற்கு முன், தான் வைத்திருந்த 22 சவரன் நகை மற்றும் ரூ.1.10 லட்சம் பணத்தை, நெல்லித்தோப்பில் உள்ள குடும்ப நண்பர் பாத்திமாவிடம் கொடுத்து விட்டு சென்றார்.

காசியில் இருந்து திரும்பி வந்த ரங்கநாயகி, கடந்த 24ம் தேதி நெல்லித்தோப்பு பாத்திமாவிடம் கொடுத்து வைத்திருந்த 22 சவரன் நகை மற்றும் ரூ.1.10 பணத்தை வாங்கிக் கொண்டு வீட்டிற்கு சென்று கொண்டிருந்தார்.

அப்போது, நெல்லித்தோப்பு சிக்னலில் சாலையை கடப்பதற்காக காத்துக் கொண்டிருந்தார்.

அங்கு கைகுழந்தையுடன் வந்த இரு பெண்கள், சாலையை கடக்க உதவி செய்வதாக கூறி ரங்கநாயகி ஜோல்னா பையில் வைத்திருந்த நகை பையை திருடிச் சென்றனர்.

இதுகுறித்து ரங்கநாயகி அளித்த புகாரின் பேரில், உருளையன்பேட்டை போலீசார் வழக்கு பதிந்து, சம்பவ இடத்தில் இருந்த சி.சி.டி.வி., பதிவுகளை ஆய்வு செய்தனர். அதில், ரங்கநாயகியிடம் திருடிய 2 பெண்களின், மொபைல் சிக்னலை வைத்து ஆய்வு செய்ததில், இருவரும் ஆந்திர மாநிலம் சித்துார் மாவட்டம், குப்பம் மண்டல், மல்லனுாரில் இருப்பதும், இருவரும் திருமலேஷ் மனைவிகள் சாரதா,32; வள்ளி,30; என்பது தெரிய வந்தது.

எஸ்.பி., சுருதி உத்தரவின் பேரில், இன்ஸ்பெக்டர் கார்த்திகேயன், சப் இன்ஸ்பெக்டர் கோவிந்தராஜன் மற்றும் போலீசார் ஆந்திராவிற்கு விரைந்து, இருவரையும் கைது செய்து நேற்று முன்தினம் புதுச்சேரிக்கு அழைத்து வந்து விசாரித்தனர்.

அதில், மூதாட்டியிடம் திருடிய நகைகளை புரோக்கர் மூலம் ரூ.15 லட்சத்திற்கு விற்று, அந்த பணத்தை செலவு செய்து வந்தது தெரிந்தது. அவர்களிடம் இருந்து ரூ. 7 லட்சம் ரொக்கத்தை போலீசார் பறிமுதல் செய்தனர்.

இருவரையும், நேற்று கோர்ட்டில் ஆஜர்படுத்தி காலாப்பட்டு சிறையில் அடைத்தனர். இருவர் மீதும் விழுப்பும் மாவட்டம், கண்டாச்சிபுரம் போலீசில் ஒரு வழக்கு உள்ளது குறிப்பிடத்தக்கது.