தவளக்குப்பத்தில், கஞ்சா பதுக்கி வைத்து, மாணவர்களுக்கு விற்பதாக வந்த புகாரின் பேரில், சிறப்பு அதிரடிப்படை போலீசார் நேற்று முன்தினம் இரவு சோதனை மேற்கொண்டனர்.

நோணாங்குப்பம் ஆற்றங்கரை பகுதியில் கஞ்சாவுடன் பதுங்கிருந்த 4 பேரை பிடித்து, தவளக்குப்பம் போலீசாரிடம் ஒப்படைத்தனர். அவர்களிடம் சப் இன்ஸ்பெக்டர் ஜெயகுருநாதன் மற்றும் போலீசார் விசாரித்தனர்.

அவர்கள், ரவுடிகளான தவளக்குப்பம் ஆனந்தராமன், 25; புதுச்சேரி, திருவள்ளுவர் சாலை சுரேஷ், 33; அவர்களது நண்பர்களான நாணமேடு மனோஜ்,24; மடுகரை ரத்தினம், 25, ஆகியோர் என்பதும், மனோஜ் அவரது நண்பர் மூலம், ஆந்திராவில் கஞ்சாவை வாங்கி, பஸ்சில் புதுச்சேரிக்கு கொண்டு வந்து விற்பனை செய்து வருவது தெரிந்தது.

அவர்கள் வைத்திருந்த ரூ.10.10 லட்சம் மதிப்புள்ள 2.20 கிலோ கஞ்சா மற்றும் 2 பட்டா கத்தி, 2 பைக், 4 மொபைல் போன்களை பறிமுதல் செய்தனர்.

இதுதொடர்பாக போலீசார் வழக்குப் பதிந்து, 4 பேரையும் நேற்று மாலை கோர்ட்டில், ஆஜர்ப்படுத்தி, காலாப்பட்டு சிறையில் அடைத்தனர்.

கைது செய்யப்பட்ட, சுரேஷ் மீது, இரண்டு கொலை வழக்குகளும், ஆனந்தராமன் மீது கஞ்சா வழக்கு, கத்தி வைத்து மிரட்டுதல், அடிதடி உள்ளிட்ட வழக்குள் இருப்பது குறிப்பிடத்தக்கது.