புதுச்சேரி அடுத்த செல்லிப்பட்டு, விநாயகம்பட்டு, வம்புப்பட்டு கிராமங்களில் 100 நாள் வேலை திட்டத்தில் வேலை வழங்க வேண்டியும், வேலை செய்த நாட்களுக்கு சம்பளம் வழங்க வலியுறுத்தியும், அதனை பெற்று தர கோரியவர்களை இழிவாக பேசிய சுயேச்சை எம்.எல்.ஏ., அங்காளனை கண்டித்து மா.கம்யூ., சார்பில், நேற்று சாலை மறியல் போராட்டம் நடத்தப் போவதாக தொகுதி முழுதும் போஸ்டர் ஒட்டப்பட்டிருந்தது.

அதனை அறிந்த அங்காளன் எம்.எல்.ஏ., தன்னை பற்றி அவதுாறாக போஸ்டர் ஒட்டியவர்களை கைது செய்ய வலியுறுத்தி நேற்று காலை 10:00 மணிக்கு செல்லிப்பட்டு பஸ் நிறுத்தத்தில் தனது ஆதரவாளர்களுடன் சாலை மறியலில் ஈடுபட்டார்.

மறியலில் ஈடுபட்ட எம்.எல்.ஏ.,விடம் எஸ்.பி., சுப்ரமணியன், திருக்கனுார் இன்ஸ்பெக்டர் ராஜகுமார், சப் இன்ஸ்பெக்டர் பிரியா மற்றும் போலீசார் பேச்சுவார்த்தை நடத்தினர். அப்போது, அவர், அவதுாறு போஸ்டர் ஒட்டியவர்கள் மீது சட்ட நடவடிக்கை எடுக்க வலியுறுத்தினார்.

இந்நிலையில், மா.கம்யூ.,வினர் சாலை மறியல் போராட்டத்திற்கு அங்கு திரண்டதால் பரபரப்பு நிலவியது.

அதனைத் தொடர்ந்து போலீசார், மறி ய லில் ஈடுபட்ட எம்.எல்.ஏ., மற்றும் அவரது ஆதரவாளர்களை காலை 10:30 மணிக்கு கைது செய்து போலீஸ் ஸ்டேஷனுக்கு அழைத்து சென்றனர்.

அதன்பிறகு மா.கம்யூ., வி னர் கொம்யூன் செயலாளர் அன்புமணி தலைமையில் மறியல் போராட்டத்தில் ஈடுபட்டனர். அவர்களிடம், வரும் 10ம் தேதிக்குள் சம்பளம் வழங்கப்படும் என்றனர்.

ஆனால், கம்யூ ., கட்சியினர் அதனை ஏற்க மறுத்து மறியலை தொடரவே, அவர்களையும் போலீசார் கைது செய்து வில்லியனுாருக்கு அழைத்து சென்றனர்.

செல்லிப்பட்டில் சுயேட்சை எம்.எல்.ஏ., மற்றும் மா.கம்யூ., கட்சியினர் அடுத்தடுத்த மறியலில் ஈடுபட்டதால் பரபரப்பு நிலவியது.