ஜப்பானில், 'சூப்பர் 500' அந்தஸ்து பெற்ற மாஸ்டர்ஸ் பாட்மின்டன் தொடர் நடக்கிறது. ஆண்கள் ஒற்றையர் பிரிவு முதல் சுற்றில் இந்தியாவின் லக்சயா சென், ஜப்பானின் கோகி வடனாபே மோதினர். மொத்தம் 39 நிமிடம் நீடித்த போட்டியில் அசத்திய லக்சயா சென் 21-12, 21-16 என்ற நேர் செட் கணக்கில் வெற்றி பெற்றார்.

மற்றொரு போட்டியில் இந்தியாவின் பிரனாய் 16-21, 21-13, 23-21 என மலேசியாவின் ஜுன் ஹாவோ லியோங்கை வீழ்த்தினார்.

மற்றொரு முதல் சுற்றுப் போட்டியில் இந்தியாவின் கிரண் ஜார்ஜ் 20-22, 10-21 என, மலேசியாவின் ஜிங் ஹாங் கோக்கிடம் தோல்வியடைந்தார். இந்தியாவின் தருண் 9-21, 19-21 என தென் கொரியாவின் ஹியோக் ஜின் ஜியோனிடம் வீழ்ந்தார். இந்தியாவின் ஆயுஷ் ஷெட்டி 16-21, 11-21 என ஜப்பானின் கொடாய் நரோகாவிடம் தோல்வியடைந்தார்.

கலப்பு இரட்டையர் முதல் சுற்றில் இந்தியாவின் ரோஹன் கபூர், ருத்விகா ஷிவானி ஜோடி 12-21, 21-19, 20-22 என அமெரிக்காவின் பிரெஸ்லி ஸ்மித், ஜென்னி ஜோடியிடம் வீழ்ந்தது.