இந்த கிராமங்களில் 800க்கும் மேற்பட்ட வீடுகள் உள்ளன. இங்கு, தெள்ளிமேடு -- வெங்கடாபுரத்திற்கு இடையே, 100 ஏக்கர் பரப்பளவில் இடம் உள்ளது.

கடந்த 10 ஆண்டுகளுக்கு முன் ரியல் எஸ்டேட் நிறுவனங்கள், இந்த இடத்தை வீட்டு மனைகளாக பிரித்து விற்பனை செய்தன.

தற்போது இந்த இடத்தில், ஆயிரக்கணக்கான சீமை கருவேல மரங்கள் வளர்ந்து, அடர்ந்த காடு போல உருவாகி உள்ளது.

இது, கிராம மக்களிடையே அச்சத்தை ஏற்படுத்தி உள்ளது. எனவே, இந்த சீமை கருவேல மரங்களை அகற்ற வேண்டுமென, கோரிக்கை வலுத்துள்ளது.

இதுகுறித்து கிராமவாசிகள் கூறியதாவது:

சீமை கருவேல மரங்கள் அதிக அளவில் வளர்ந்து உள்ளதால், குடியிருப்புகளுக்குள் பாம்பு உள்ளிட்ட விஷ ஜந்துக்கள் நடமாட்டம் அதிக அளவில் உள்ளது.

கடந்த சில மாதங்களுக்கு முன், மூதாட்டி ஒருவரை பாம்பு கடித்து, சிகிச்சைக்குப் பின் உயிர் பிழைத்தார்.

இந்த கருவேல மரங்கள் உள்ள பகுதிகளில், கிராமத்திற்கு தொடர்பு இல்லாத மர்ம நபர்களின் நடமாட்டம் உள்ளது.

கடந்த ஆண்டு ஊராட்சி மன்ற அலுவலகம் மற்றும் அதைச் சுற்றியுள்ள வீடுகளின் பூட்டு இரவு நேரத்தில் உடைக்கப்பட்டு, கொள்ளை சம்பவம் நடந்தது.

அதேபோல, சாய் நகர் பகுதியில் இளைஞர் ஒருவரை கத்தியால் வெட்டி, மொபைல் போனை மர்ம நபர்கள் பறித்துச் சென்றனர். இந்த சீமை கருவேல மரங்கள் சமூக விரோதிகளின் கூடாரமாக மாறியுள்ளது.

இதுபோன்ற சம்பவங்கள் எங்கள் கிராமத்திற்கு புதிது. மேலும் கடந்த ஜன., மாதம், தெள்ளிமேடு கிராம ஏரிக்கரையில், வாலிபர் ஒருவர் முன் விரோதம் காரணமாக கொலை செய்யப்பட்டார்.

எனவே, மாவட்ட நிர்வாகம் இந்த சீமை கருவேல மரங்களை அகற்ற நடவடிக்கை எடுக்க வேண்டும்.

இவ்வாறு அவர்கள் கூறினர்.