காட்டாங்கொளத்துார் ஒன்றியம், சிங்கபெருமாள் கோவில் ஊராட்சியில், சென்னை - திருச்சி தேசிய நெடுஞ்சாலை ஓரத்தில், திருத்தேரி தாங்கல் ஏரி உள்ளது.

இந்த ஏரி 2022ம் ஆண்டு,'அம்ரித்சரோவர்' திட்டத்தின் கீழ், 39 லட்சத்து 40 ஆயிரம் ரூபாய் மதிப்பில் துார்வாரப்பட்டு, கரைகள் பலப்படுத்தப்பட்டு, ஏரியைச் சுற்றி இரும்பு கம்பி வேலி அமைக்கப்பட்டது.

ஏரியின் நடுவே, பறவைகளுக்காக மணல் திட்டுகள் அமைக்கப்பட்டு, அதில் மரக்கன்றுகள் நடப்பட்டன.

இந்த பணிகள் நிறைவடைந்து, 2022ம் ஆண்டு டிசம்பரில், அப்போதைய செங்கல்பட்டு கலெக்டர் ராகுல்நாத், செங்கல்பட்டு தி.மு.க., -- எம்.எல்.ஏ., வரலட்சுமி உள்ளிட்டோர், திறந்து வைத்தனர். அப்போது, துார்வாரப்பட்ட ஏரியை முறையாக பராமரிக்க வேண்டும் என, ஊராட்சி நிர்வாகத்திற்கு கலெக்டர் ராகுல்நாத் அறிவுறுத்தினார்.

ஆனால், கடந்த மூன்று ஆண்டுகளாக, சிங்கபெருமாள் கோவில் ஊராட்சியில் இருந்து சேகரிக்கப்படும் குப்பை, இந்த ஏரியின் நீர்ப்பிடிப்பு பகுதியில் கொட்டப்பட்டு, தீ வைத்து எரிக்கப்படுவதால், தண்ணீர் மற்றும் சுற்றுச்சூழல் மாசடைந்து வருகிறது.

மேலும், இந்த ஏரி ஜி.எஸ்.டி., சாலை ஓரத்தில் உள்ளதால், ஏரியில் இரவு நேரங்களில் பலர் இறைச்சி கழிவுகள், மற்றும் குப்பையை கொட்டி விட்டுச் செல்கின்றனர்.

இந்த குப்பையை நாய்கள் கிளறி சாலை வரை இழத்துப் போடுவதால், இந்த பகுதியை கடக்கும் இருசக்கர வாகன ஓட்டிகள் விபத்தில் சிக்கி வருகின்றனர்.

மேலும், நெடுஞ்சாலையில் முறையான கழிப்பறை வசதி இல்லாததால், லாரி டிரைவர்கள் இயற்கை உபாதைகளை இந்த பகுதியில் கழிப்பதால், சுகாதார சீர்கேடு ஏற்படுகிறது.

எனவே இந்த பகுதியில் குப்பை கொட்டப்படுவதை தடுக்க, மாவட்ட நிர்வாகம் உரிய நடவடிக்கை எடுக்க வேண்டும் என, இயற்கை ஆர்வலர்கள் கோரிக்கை விடுத்துள்ளனர்.

திருத்தேரி ஏரி சென்னை புறநகரின் நுழைவுப் பகுதியில், சாலை ஓரம் உள்ளது. இந்த ஏரியை குப்பை கொட்டி அழிக்கும் வேலைகள் தற்போது நடைபெற்று வருகின்றன. இந்த ஏரியில் உள்ள பொது கிணறு மூலமாக, ஊராட்சி பகுதிகளுக்கு குடிநீர் வினியோகம் செய்யப்படுவதால் நோய் தொற்று பரவும் அபாயம் உள்ளது. எனவே, மாவட்ட நிர்வாகம் தண்ணீரில் குப்பை கொட்டுவோர் மீது கடும் நடவடிக்கை எடுக்க வேண்டும். - எஸ்.முரளி, செங்கல்பட்டு.