சென்னை - புதுச்சேரி கிழக்கு கடற்கரை சாலையை, தமிழ்நாடு சாலை மேம்பாட்டு நிறுவனம், 2003 முதல் சுங்க கட்டண சாலையாக நிர்வகித்தது.

இதில், மாமல்லபுரம் - புதுச்சேரி பகுதி, 2018ல் தேசிய நெடுஞ்சாலை '332ஏ' என மாற்றப்பட்டது.

இத்தடத்தை நான்கு வழிப்பாதையாக மேம்படுத்தும் பணிகள், 2022 முதல் நடைபெற்று வருகின்றன. சாலை விரிவாக்க தேவைக்காக, திருக்கழுக்குன்றம் தாலுகாவில் 10 பகுதிகள் மற்றும் செய்யூர் தாலுகாவில் எட்டு என, மொத்தம் 18 பகுதிகளில் தனியார் நிலம் கையகப்படுத்தப்பட்டது.

கடந்த 1956ம் ஆண்டு, தேசிய நெடுஞ்சாலைகள் சட்ட பிரிவுகள் விதிகளின்படி, கையகப்படுத்தப்பட்ட நிலம் குறித்த விபரம் இந்திய அரசிதழில் அறிவிக்கப்பட்டது.

இதுகுறித்து பொது அறிவிப்பும் தமிழ், ஆங்கில நாளிதழ்களில் வெளியிடப்பட்டது.

கையகப்படுத்தப்பட்ட நிலம், எத்தகைய வில்லங்கமும் இல்லாமல், மத்திய அரசிற்கு சொந்தமானதாக, இந்திய தேசிய நெடுஞ்சாலை அமைச்சகம் அறிவித்தது.

கையகப்படுத்தப்பட்ட நிலத்தின் உரிமையாளர்கள் அல்லது அதற்கு பாத்தியப்பட்டவர்கள், செங்கல்பட்டில் உள்ள தேசிய நெடுஞ்சாலைகள் நிலம் எடுப்பு பிரிவு, சிறப்பு மாவட்ட வருவாய் அலுவலர் அலுவலகத்தில், 60 நாட்களுக்குள், தினமும் காலை 10:00 மணி முதல், மாலை 5:45 மணி வரை இழப்பீடு பெற்றுக் கொள்ளலாம்.

இழப்பீடு பெற்று, நிலம் ஒப்படை சான்றளிக்குமாறு, சாலை போக்குவரத்து மற்றும் நெடுஞ்சாலை அமைச்சகம் அறிவித்துள்ளது.

தவறினால், 60 நாட்களுக்குப் பிறகு, போலீசாரின் உதவியுடன் நிலத்தை கையகப்படுத்தி, சம்பந்தப்பட்டவர் மீது சட்ட நடவடிக்கை எடுப்பதாகவும் தெரிவித்து உள்ளது.