செங்கல்பட்டு மாவட்டத்தில் ஏழு சட்டசபை தொகுதிகள் உள்ளன. மாவட்டத்தில் சட்டசபை தொகுதியில் வாக்காளர் பட்டியல் சிறப்பு தீவிர திருத்தப் பணி கடந்த 4ம் தேதி துவங்கி, டிச., 4ம் தேதி வரை நடக்கிறது.

மாவட்டத்தில் உள்ள ஏழு சட்டசபை தொகுதிகளில் உள்ள 27 லட்சத்து 87,362 வாக்காளர்களுக்கு, 2,826 ஓட்டுச்சாவடி நிலைய அலுவலர்கள் கணக்கீட்டு படிவங்களின் பிரதிகளை வழங்கினர்.

இதில், 800க்கும் மேற்பட்ட ஓட்டுச்சாவடி அலுவலர்கள் புதிதாக நியமிக்கப்பட்டு உள்ளனர். கூடுதல் மாவட்ட தேர்தல் அலுவலர்கள், ஏழு சட்டபை தொகுதிகளில் தலா ஒரு ஓட்டுப்பதிவு அலுவலர், உதவி ஓட்டுப்பதிவு அலுவலர் 23 பேர், மேற்பார்வையாளர்கள் 300 பேர் என, 3,149 பேர் பணியில் ஈடுபட்டுள்ளனர்.

மாவட்டத்தில் ஏழு சட்டசபை தொகுதிகளில் சோழிங்கநல்லுார், பல்லாவரம், தாம்பரம் ஆகிய பகுதிகளில் அடுக்குமாடி குடியிப்புகள் அதிகமாக உள்ளன. செங்கல்பட்டு, திருப்போரூர் ஆகிய சட்டசபை தொகுதிகளில், அடுக்குமாடி குடியிருப்புகள் குறைவாக உள்ளன.

இந்த குடியிருப்புகளில் வாக்காளர்களுக்கு கணக்கீட்டு படிவங்களின் பிரதிகளை வழங்க ஓட்டுச்சாவடி அலுவலர்கள் செல்லும் போது, முகவரி மாறி சென்றுவிட்டதாக தகவல் கிடைக்கிறது.

இதனால், வாக்காளர்களை தேடிக் கண்டுபிடித்து கணக்கீட்டு படிவங்கள் வழங்கும் பணியில், ஓட்டுச்சாவடி நிலைய அலுவலர்கள் ஈடுபட்டனர்.

அத்துடன், அடுக்குமாடி குடியிருப்புகளில் உள்ளவர்கள், அரசு அலுவலர்களை உள்ளே அனுமதிக்காததால், கணக்கீட்டு படிவங்கள் வழங்க முடியாத சூழல் ஏற்பட்டது.

இந்த வகையில் செங்கல்பட்டு மாவட்டத்தில் உள்ள ஏழு சட்டசபை தொகுதிகளில், 27 லட்சத்து 87,362 வாக்காளர்களில், 27 லட்சத்து 6,749 வாக்காளர்களின் வீடுகளுக்கு சென்று, வாக்காளர் கணக்கீட்டு படிவங்களின் பிரதிகள் வினியோகம் செய்யப்பட்டுள்ளன.

இதில், 16 லட்சத்து 25,633 படிவங்கள் திரும்ப பெறப்பட்டுள்ளன.

மேலும், கணக்கீட்டு படிவங்களை திரும்ப பெறும் பணியில், ஓட்டுச்சாவடி அவவலர்கள் தீவிரமாக ஈடுபட்டுள்ளனர். இதற்கிடையில், இப்பணியில் கவனக்குறைவாக ஈடுபட்ட பல்லாவரம், திருப்போரூர், செய்யூர் ஆகிய சட்டசபை தொகுதிகளைச் சேர்ந்த ஓட்டுச்சாவடி நிலைய அலுவலர்கள் 13 பேர், மேற்பார்வையாளர்கள் ஏழு பேர் என, 20 பேருக்கு விளக்கம் கேட்டு, மாவட்ட தேர்தல் அலுவலர் மற்றும் கலெக்டர் சினேகா ஆகியோர் 'நோட்டீஸ்' வழங்கி உள்ளனர்.

செங்கல்பட்டு மாவட்டத்தில் உள்ள ஏழு சட்டசபை தொகுதிகளில், வாக்காளர் கணக்கீட்டு படிவம் வழங்கும் பணியில், 12 மணி நேரம் முதல் 18 மணி நேரம் வரை, மன உளைச்சலுடன் ஓட்டுச்சாவடி அலுவலர்கள் பணிபுரிந்து வருகின்றனர். இப்பணியை சிறப்பாகச் செயல்படுத்த, அங்கீகரிக்கப்பட்ட அரசியல் கடசியினர், விவசாயிகள், வணிகர்கள், பொதுமக்கள் ஆதரவு அளிக்க வேண்டும். - சினேகா, கலெக்டர்